NUWE DVD’S

THE REVENANT

2015. 150 min. 13TG. Avontuur. In die 1820’s val ’n beer die jagter Hugh Glass ( tydens ’n ekspedisie in die onherbergsame Amerikaanse Weste aan. Die res van sy geselskap, onder wie John Fitzgerald (Tom Hardy), neem sy geweer af en laat hom vir dood agter, maar hy oorleef en kruip kilometers ver terug huis toe om wraak te neem.

Hierdie fliek is deels gegrond op Michael Punke se gelyknamige roman van 2002 oor die ware ervarings van Glass in 1823 in die huidige Montana en Suid-Dakota.

Dit is al as ’n kampvuurstorie beskryf, maar die bekroonde Mexikaanse regisseur Alejandro G. Iñárritu (Biutiful, Birdman) verhef dit tot ’n meesterstuk. Dié rolprent, wat drie Oscars gewen het, is wondermooi in natuurlike lig verfilm, en die visuele effekte, grimering, oppervlakmodellering en klankbaan is puik.

Die fiktiewe toevoegings (soos dat Glass in ’n perd se karkas oornag) tot die oorspronklike gebeure dra tot die fliekervaring by, maar kykers kan dalk voel die storie raak te dik vir ’n daalder en uitmergelend.

DiCaprio ontroer in dié fisiek uitdagende rol wat hom eindelik daardie ontwykende Oscar as beste akteur besorg het. Was dit nie dat ’n mens die indrukwekkende Hardy – hy is vir ’n Oscar as beste manlike byspeler benoem – soms moeilik volg nie, sou die rolprent vyf sterre gekry het. – MARIANA LOOTS * DVD’S is teen dié pryse beskikbaar by takealot.com.

2015. 102 min. 13VG. Ware lewensdrama. Dié kragtige prent herinner ’n mens hoe ver vroueregte binne skaars ’n eeu gevorder het. Pleks van om die hele geskiedenis van die stemregbeweging in Brittanje te probeer inprop, fokus die vervaardigers op die inspirerende verhaal van Maud (Carey Mulligan). Dié jong ma is verteenwoordigend van die werkersklas en word in die 1920’s in Londen vir die beweging gewerf. Sy besef geleidelik net omdat diskriminasie teen vroue die norm is, beteken dit nie dis reg nie. ’n Skitterende rolverdeling met onder andere Helena Bonham Carter, die onberispelike herskepping van die era en ’n waardige en steeds relevante onderwerp sorg vir ’n uitmuntende rolprent. – SANDRA VISSER

KRAMPUS

Hierdie tyd van die jaar kan Kersfeesflieks so muf voel soos die vergete stuk vrugtekoek in die koelkas. Maar die regisseur, Michael Dougherty, maak met Krismis soos hy in Trick ’r Treat (2007) met Halloween gemaak het: Hy lê die bloedkwas in. Max (Emjay Anthony), ’n seun wie se familie hul neus vir hierdie feestyd optrek, roep per ongeluk die bose Kers-oerdemoon, Krampus, op. Dan bars die hel los tussen silwer klokkies, helderkleurige geskenke en sneeumanne. Toni Collette as die ma hou die leisels stewig vas in hierdie wilde sleerit deur Kersfees. Moenie jou kinders alleen laat kyk nie. Die perk is om ’n goeie rede daar. – PIETER VAN ZYL

THE LADY IN THE VAN

komedie. Maggie Smith hervat ’n rol wat sy byna 20 jaar gelede op die planke vertolk het. Sy skitter as Mary Shepherd, ’n hawelose vrou wat 15 jaar lank in haar paneelwa in die oprit van die dramaturg Alan Bennett se huis gewoon het. Alex Jennings speel Bennett, wat hom geleidelik oor Mary ontferm. Aanvanklik is sy ’n raaisel: Waarom woon sy daar? Dié prent, gegrond op ware gebeure, is skreeusnaaks, maar het ook ernstige ondertone. Die uitspattige klimaks kelder egter die geheel en voel heeltemal onvanpas. – PETRUS MALHERBE Pryse was korrek met druktyd en is onderworpe aan verandering sonder vooraf kennisgewing.