Sibling Stoep Tasting vind groot byval
Chriszanne Janse van Vuuren
Die Karoo Wine Club en Nieu-Bethesdatoerisme het vanaf 17 tot 18 Mei hierdie jaar vir die heel eerste keer The Sibling Stoep Tasting Wine Weekend aangebied.
The Sibling Stoep Tasting is ontwerp om nuwe wynmakers by die Stoep Tasting te verwelkom terwyl The Original Stoep Tasting vir die meer gevestigde wynmakers gereserveer is.
The Sibling Stoep Tasting was werklik ‘n besondere geleentheid vir wynliefhebbers en vir die meer as 50 nuwe wynprodusente wie se wyne op stoepe in Graaff-Reinet en NieuBethesda te proe en te koop aangebied is.
Chantelle Boucher, bemarkingsbestuurder van die Paarl se Paardeberg wynkelder, sê dat hulle baie geëerd is om deel van The Sibling Stoep Tasting te kon wees.
“Dit was die eerste keer wat ons ons premium reekse kon deel met diegene wat regtig ‘n goeie belangstelling toon in wyn.
Ons sien uit om terugvoering te kry oor wat hulle gedink het van ons wyne,” sê sy.
Shazell van den Berg, wynmaker van Stellenbosch se Nilberg wyne, vertel dat hulle nog baie nuut in die industrie is. “Ons is in 2014 gestig en het ons wynlisensie so twee jaar gelede eers gekry,” sê sy. “Dit was ons heel eerste fees en dit was werklik ‘n groot eer.”
Die spannetjie van Stellenbosch se Beyerskloof-kelders het The Sibling Stoep Tasting werklik baie geniet.
“Graaff-Reinet is so ‘n mooi dorpie en om dit te voet te kon ervaar was werklik baie besonders. Dit was wonderlik om deur die strate te kon stap en dit boonop met ‘n wyntjie in die hand. Dit was net lekker en ons sal definitief volgende jaar terug wees.”
The Original Stoep Tasting Wine Weekend vir al die ou wynmakers sal komende naweek, 25 tot 27 Mei, aangebied word. “Sien julle daar!”