Jones skuldig op vier aanklagte van bedrog
'n Bedrogsaak wat oor agt jaar gestrek het, is Dinsdagmiddag, 31 Januarie, in die George-landdroshof gefinaliseer. Oud-portefeuljeraadslid van behuising, Henry Jones (63), of Oom Hennie, soos hy alombekend staan, is skuldig bevind op vier aanklagte van bedrog. Al die sake hou verband met die onwettige verkoop van Hop-huise gedurende die termyn waartydens hy op die raad gedien het.
Die vonnisoplegging vind op Donderdag 16 Maart plaas.
Jones se regsverteenwoordiging van Legal Aid het 'n geleentheid versoek om verslae, wat onder meer sy gesondheidstoestand sal bevestig, voor die vonnisoplegging voor die hof te bring.
Die saak is aangehoor deur landdros Praglathan Govender en die staatsaanklaer is adv. Xolile Jonas.
Jones se gesondheid was deurentyd 'n faktor wat veroorsaak het dat die saak telkens uitgestel moes word. Hy is 'n diabeet met hartkwale en het ook kolonkanker onder lede.
Op die hofbanke
Terwyl ons Maandagoggend vir sy saak wag, vertel Jones van sy aansoek om behuising by Rosemoor-tehuis vir bejaardes. "Ek voel glad nie goed nie. My bene is verswak, my pasaangeër se battery moet vervang word en ek het 10% nierfunksie," het hy gesê.
"Ek het ook groot drome gehad toe ek jonk was. Ek wou graag 'n prokureur word, maar die geleentheid was nie daar nie. Ek het my ma verloor toe ek vyf jaar oud was. Ek het nooit gematrikuleer nie. Ek het nege kinders en 18 kleinkinders."
Jones het vir sy susters en broer in die kosbedryf gehelp alvorens hy die politiek betree het. Hy vra die gemeenskap van Pacaltsdorp om verskoning indien hy hulle gefaal het.
Op 'n vraag of dit oor die Hop-huise gaan, het hy gesê: "Nee, ek kon hulle nie op politieke front van 2016 af lei tot nou nie. My kinders moet my asseblief ook vergewe vir al die jare wat ek hulle afgeskeep het oor die politiek wat altyd 'n prioriteit was."
"Ek berus my by alles. Ek kan niemand kwalik neem nie. Ek hoop en vertrou die Here dat alles sal uitwerk. Ek het almal vergifnis gevra wat ek skade gedoen het."
Na die skuldigbevinding het Jones eenkant, op een van die hofbanke in die gang van die hof gaan sit. Sy vriendin moes hom soek. Trane het by sy wange afgerol. "Ek bly steeds positief," het hy gesê.