Man glo in polisiestasie op Uniondale aangerand
Kristy Kolberg
'n Man van Uniondale is na bewering deur 'n vroue administratiewe klerk, wat van diens af was, by die Uniondalepolisiestasie aangerand. Volgens Hendrick Metik het sy hom 'n "moffie" genoem en sy kop teen 'n deur gestamp.
"Daar was 'n beampte aan diens in wie se teenwoordigheid die voorval plaasgevind het. Hy het niks gedoen om te keer nie," sê Metik.
Metik het klagtes van aanranding en naamskending teen die klerk gemaak, sowel as 'n klag van nalatigheid teen die beampte wat teenwoordig was.
Die Suid-Kaapse polisiewoordvoerder, kapt. Malcolm Pojie, het die voorval bevestig en genoem dat die kriminele saak teen die klerk reeds volledig ondersoek is.
"Die beskuldigde het reeds voor die plaaslike landdroshof verskyn op 'n aanklag van aanranding.
“Die saak is hangend en nog nie gefinaliseer nie," sê hy.
Volgens Pojie word 'n departementele saak teen die vermelde lede ondersoek na aanleiding van die beweringe wat deur Metik gemaak word.
"Die aangeleentheid en die prosedure is deur die stasiebevelvoerder aan Metik verduidelik. Al ons lede, veral in die dienssentrum, bly verbind tot die lewering van professionele dienslewering," sê Pojie.