Ikhala ngabashayeli bamabhasi Inkosi yakwaBiyela
SELUFIKE kwelinye izinga udaba lokwentuleka kwezinto zokuthutha, esizweni sakwaBiyela, njengoba isiteleka samabhasi sesingenelela esontweni lesibili.
Lesi senzo sesicike neNhloko yoMkhandlu wasoBuka, iNkosi Phiwayinkosi Biyela, ethe idumele ngesenzo soMnyango Wezokuthutha, awusole ngokuhudula izinyawo ukulungisa isimo.
‘Ngiyasihlaba lesisenzo soMnyango Wezokuthutha ngendlela osingethe ngayo loludaba. Okubuhlungu kakhulu wukuthi lesi simo sibeka engcupheni impilo yomphakathi, njengoba abanye besebenzisa amabhasi ukuyolanda amaphilisi okugula.
Okunye ekuchaze njengokuzwela kakhulu ukuthi njengoba umphakathi wakulendawo, usebenzisa idolobha ukuze uthole ukudla nezinye izidingo ezihambisana nokusondela ezikhungweni zokuhola imali yesibonelelo kuba bukhuni ukuthi bafinyelele edolobheni ngoba izinto ezikhona zokuhamba azenele njengoba lesisizwe sisikhulu, kanti namanani okugibela awefani.
Iphinde yakhala kakhulu ngalabo abazibiza ngamakomidi amele abagibeli ezinkampanini zamabhasi, ukuthi indlela abenza ngayo ayibenelisi njengoba bengakaze futhi behlangane nanayo, inkosi ukuzethula kodwa bazithathela izinqumo bebodwa.
Mayelana nabashayeli, iphinde yakuveza ukuthi iyakuqonda ukuthi kufanele baliveze izwi labo uma benganeliseki, kodwa njengenkosi yesizwe bekufanele ukuthi bangibikele ukuze ngibone lapho ngingabasiza khona, kunokuthi abantu baswele izinto zokuhamba.
Igcine ngelokuthi sebelindele umhlangano ozoba khona phakathi kwabo nomnyango kanye nenkampani ukuze bebona enye yezindlela abangadlula ngayo kulenkinga.
Okhulumela uMnyango Wezokuthutha uMnuz. Kwanele Ncalane uthe njengomnyango kunezinhlelo abazisebenzisayo uma sekushintshwa izinkampani zamabhasi, ngoba kusuke kunqunyelwene isikhathi inkampani ezosihlala, nokwenza kube bukhuni ukuthi bayikhiphe isikhathi okuvunyelenwe ngaso singakapheli.
Uqhubeke wakucacisa ukuthi abakwenzayo kuye kube ukuhambela kuleyondawo, beyozwa inkinga ekhona phakathi kwenkampani esuke inikwe ithenda kanye nomphakathi ukuthi ikuphi bese kuboniswana ngaleyonkinga.
Ugcine ngelokuthi uma ingaxazululeki inkinga, iyaye imiswe bese becela enye inkampani ukuthi ibambe okwesikhashana, kodwa lokho okungasho ukuthi lowo msebenzi usuke usuqondene naleyonkampani. Inhloso yomnyango kusuke kungukusiza umphakathi ukuze uthole izinto zokuthutha.
Bus strike angers iNkosi Biyela