Bekuhlangene okokuqala ubuholi besifazane beqembu leIFP
KUHLANGENE okokuqala ubuholi besifazane beqembu leIFP phansi kwesiFunda saseKing Cetshwayo ngemuva kokhetho lapho kade kukhethwa khona ubuholi obuzohola lesisiyingi.
Usihlalo ohola loluphiko uNkk Nonhlanhla Nzuza nophinde abe yisekela lemeya yaseNkandla uveze ukuthi bazimisele ukusebenza kakhulu ngokuzikhandla njengoba kuyibona abawumgogodla waleliqembu nabanenselelo yokulifukula balibeke ezingeni elifanele.
‘INhloso yethu enkulu yalomhlangano ukuthi silekelele zonke izinhlaka zethu ekutheni ziqine ukuze sikwazi ukufeza izinhloso zomholi wethu iNkosi Mangosuthu Buthelezi ukuyisa iqembu phambili,’ kuchaza uNkk Nzuza.
Uphinde wakuveza ukuthi okunye abafuna ukukwenza ukuthi bakhulise isibalo samaziko esizobamba elikhulu iqhaza ekufundiseni abantu ukuthi imisebenzi yeqembu iqutshwa kanjani ukuze kuqiniswe zonke izinhlaka zeqembu.
‘Njengoba seluseduze ukhetho lwesifundazwe kuhlangene nolukazwelonke sifuna ukufundisa wonke amalungu aleliqembu ngenqubomgomo yeqembu ekufanele bayilandele ukuze kuthi uma sekukhethwa kungabi nazo izinkinga ezingagcina sezifake iqembu enkingeni eziphikisana nobuholi,’ Kubeka uNkk. Nzuza.
Ugcine ngelokuveza izinhlelo abanazo zokuhambela zonke izinhlaka zeqembu kanye namaziko aphansi kwesifunda saseKing Cetshwayo ukwenza isiqiniseko sokuthi zonke izinto sezimi ngomumo njengoba ukhetho selusondele.
The IFP Women’s Brigade met for the first time following the IFP elective conference in the King Cetshwayo District