’n Warm suksesverhaal tydens Laerskool Nelspruit se interlaer
Die Goldwagen Nelspruit Interlaeratletiekbyeenkoms van 17 Februarie was ’n dag wat vir baie jare nog in die geskiedenisboeke van Laerskool Nelspruit aangeteken sal bly.
Die tema vir hierdie jaar was “Oorskry jou grense!” en die atlete, asook die termometer, het presies net dít gedoen.
In ’n skrille kontras met verlede jaar, wat deur ’n tropiese sikloon ontwrig is, het die kwik vanjaar tot in die rooi gestyg. En so warm soos die son was, so warm was dié dag se aksie op die die veld en baan.
“Ons het Sondag met ’n hart vol dankbaarheid opgestaan,” het die skool se skakelbeampte, Johan Orton, oor die sukses van die dag gesê. “Vanjaar se interlaer het ’n gees van mededinging en kameraadskap uitgelok, en al ons skole se atlete het hul grense oorskry en hul uiterste beste gedoen om hul vaardighede te wys en die naam van hul skool hoog te hou.”
Laerskool Nelspruit, wat die dag onverbeterlik by Hoërskool Nelspruit aangebied het, se atlete het nie net hul eie grense oorskry nie, maar ook die verwagtinge van die toeskouers wat bankvas agter hulle gestaan het.
Hoe dan anders as om te sorg vir kookwateratletiek, met nege van die 13 trofeë wat in die guns van die gasheer geval het? Dié skool se steratlete was onder andere Aimee Dippenaar, wat nie net die titel van beste dogtersatleet (baan en hekkies) verower het nie, maar ook bekroon is vir die beste algemene prestasie van die dag. Stefan Augustyn het die titel van beste seunsatleet (baan en hekkies) met oortuiging verdien. Jessica Badenhorst is die senior victrix ludorum van die byeenkoms, en Ruben Luus se prestasies op die veld was ongeëwenaard, en hy is as die beste seunsatleet in dié kategorie bekroon.
Ihvan Pretorius het die titel van beste seunsatleet in die middelafstande verower, en Bernard Calitz is die senior victor ludorum van die byeenkoms.
“Hoewel ons dankbaar is vir dié uitslae, wil ons aan elke deelnemer wat die voorreg gehad het om sy/haar skool te verteenwoordig en deelgeneem het, geluk sê. Laerskool Nelspruit is trots op elke deelnemer wat deelgeneem het, ongeag van die uitslae. Die gees van sportmanskap en die strewe na uitnemendheid wat tydens hierdie geleentheid getoon is, versterk ons oortuiging dat ons atlete nie net op die atletiekbaan nie, maar ook in die lewe, groot dinge kan bereik.“Ons sien met groot verwagting daarna uit om voort te bou op hierdie sukses en om ons atletiekprogram verder te ontwikkel. Baie dankie aan almal wat betrokke by die organisasie en ondersteuning van hierdie gedenkwaardige geleentheid was. Dankie aan al ons vennote in terme van borge en mediavennote wat saam met ons hande gevat het om van die dag ’n groot sukses te kon maak. U toewyding as borg het ’n groot impak op die sukses van die dag gehad. U finansiële bydrae het gehelp om die koste van die byeenkoms te dek, wat ons natuurlik in staat gestel het om ’n onvergeetlike ervaring vir al die deelnemers en ondersteuners te skep. Laerskool Nelspruit wil dan graag van die geleentheid gebruik maak om vir Pieter Linde en sy vennote van Goldwagen Nelspruit uit te sonder, wat as titelborg van die dag opgetree het. Groot waardering ook aan al die besoekende skole se personeel en hulle beamptes vir hul harde werk. Dankie vir julle vriendskap en ondersteuning, mag die simbiose en vriendskapsverhouding tussen die Laeveldskole altyd sterk staan.
“Ons wil ook ons dank betuig aan Laerskool Nelspruit se personeel, algemene werkers en ons ouerhulp wat die ruggraat in ons span se sukses was. Ons is natuurlik ook trots op die fantastiese vertonings wat ons atlete gelewer het,” het Orton afgesluit.