DOH di ganahang mangita sa COVID-19
Kon ang lockdown di garantiya sa pagbadlong sa COVID-19, labi na kon di dasonan sa lapad nga testing sa tanang gidudahang nataptan ug sa ubang agresibo nga mga lakang sa pagpangita sa kagaw, napamatud-an sa Singapore nga wa kinahanglana ang lockdown sa pagkontrolar sa tinakdanay sa COVID-19.
Ang Singapore usa sa labing unang nasud nga natakdan sa kagaw nga gituohang gikan sa Wuhan, China. Gani, sila maoy labing daghan og kaso sa COVID-19 gawas sa China sa pagsugod og sulbong sa mga pasyente sa Wuhan ug kasilinganan nga mga dapit.
***
Wa matinuod ang kabalaka nga ang Singapore mamahimo nga laing Wuhan tungod sa hingpit nilang pagpangandam bisan sa wa pa ang labing unang kaso sa COVID-19. Ginamit ang kasinatian pag-atiman sa daghang pasyente sa Severe Acute Respiratory Syndrome (SARS) niadtong 2003, ang Singapore nakapalig-on nang daan sa ilang mga tambalanan ug nakapundo na og daghang ventilators ug ubang kahimanan alang sa labing seryusong mga pasyente ug personal protective equipment (PPEs) ug ubang panagang sa health workers.
Maong sila pay nanghatag og test kits ug ubang hinabang sa Pilipinas ug ubang naapiking kanasuran.
***
Apan ang alas g’yud sa Singapore batok sa COVID-19, nga gipasidunggan sila sa World Health Organization (WHO) ug mga eksperto sa nagkalainlaing kanasuran, mao ang epektibo nilang contact tracing sa tanang nakaduol ug posibleng natakdan sa mga pasyente sa COVID-19.
Gatosan ka contact tracers nga naglakip sa kapolisan naglihok tibuok adlaw ug gabii pagtultol sa tanang nakauban sa matag positibong kaso ug wa mohunong hangtod nga nailhan ug na-quarantine ang tanang close contacts.
***
Lahi sa Pilipinas. Pipila ra ang mga kawani sa Epidemiology Bureau sa Department of Health (DOH) ug busa pipila ra sa close contacts ang nasubay. Uwahi nang nagpatabang sa mga polis dihang naalarma ang mga senador nga ang mayoriya sa posibleng natakdan sa unang tulo ka kaso sa COVID-19 wa nila igkita.
Ug bisan gitabangan na sa kapolisan, ang DOH mapagarbuhong nipahibawo nga gihunong na nilang contact tracing kay nilapas na sa 14 ka adlaw nga incubation period. Hinaot nga ang nisulbong nga community transmission sa Metro Manila ug ubang bahin sa Pilipinas di tungod sa ilang pagpangiyugpos.