Way kinutobang sakit
Si Davao City Mayor Sara Duterte nitataw nga way gitago ang iyang amahan sa tinuod nga kahimtang sa iyang panglawas. Iya ning tubag sa nitumaw nga mga awhag nga ipagawas sa Malakanyang ang medical bulletin sa presidente tungod sa pagsige niya og reklamo nga gikapoy na siya ug ganahan nang mokanaog sa katungdanan.
Tinuod nga si Presidente Duterte ang niboluntaryo sa kasayuran sa nagkalainlain niyang sakit: Buerger’s
Disease ug Barrett’s Esophagus o GERD (tungod sa iyang panigarilyo) ug slipped disk (tungod sa aksidente sa motorsiklo). Apan way nagtagad paghatag og dugang detalye.
***
Kasagaran sa mga kumpisal ni Presidente Duterte sa iyang mga sakit gihimo atol sa iyang mga diskurso, labi na sa kalihokan nga nauwahi siya pag-ayo, ug gipakapinan og mga detalye nga nagkuha og tambal sa iyang bay o nihapit og ospital.
Kay nagdiskurso man, way nangahas pag-isa sa kamot ug pagkuha og dugang kasayuran. Nag-agad lang tang tanan unsay iyang itug-an: Nga hapit kada adlaw ang iyang labad sa ulo ug nga ang sakit nga iyang nabatyagan kagradohan og 7 sa sukdanan gikan sa 1 ngadto sa 10.
***
Sa iyang aksidente sa motorsiklo, anam-anam ang mga detalye nga giluwatan: Kausa, niingon nga nahitabo ang aksidente 10 ka tuig ang nilabay; sa laing higayon, niingon nga naaksidente sa nagpangedaron og 67 (sa ato pa, unom ka tuig ang nilabay); hangtod nga niangkon nga kaduha gyud diay siya nalamba sa motorsiklo.
Niadtong Pebrero sa niaging tuig, nipahibawo ang presidente nga nagpa-EKG siya kay nagsakit ang iyang dughan. Apan iyang mga tigpamaba niingon nga nagpalusot lang ang presidente sa iyang pagkauwahi sa kalihokan sa Bureau of Internal Revenue (BIR).
***
Di lalim ang kahimtang sa presidente kon tinuod ang pangangkon sa way hunong nga sakit nga iyang nabatyagan. Mao bay hinungdan nga matag karon ug unya mokuwestiyon siya duna bay Ginoo? Ug nga mag-usab-usab ang iyang mga sulti ug nagkasukwahi ang iyang mga pahibawo ug mga pasangil?
Unsa may epekto sa grabeng sakit sa iyang panglawas ug panghunahuna? Nakatabang ba o nakaiban sa iyang katakos sa padayon nga pagatiman sa labing komplikado nga inadlaw nga mga gimbuhaton sa pagduma sa nasud?