Sukwahi sa tanang pasalig
Hapit tanang kompaniya sa lana nakapahamtang na karong semanaha sa makalilisang nga excise tax sa ilang mga produkto ubos sa Tax Reform for Acceleration and Inclusion (TRAIN) ni Presidente Rodrigo Duterte. Nga nakapapa-apiki pag-ayo sa mga motorista kay nagsige sab og layat ang presyo sa lana sa merkado sa kalibotan sukad sa pagsugod sa bag-ong tuig.
Nawani ang pasalig sa economic managers ni Presidente Duterte, ang tinuod nga mga utok sa TRAIN, nga karon ang tukmang panahon sa pagpatuman sa excise tax samtang nagsige pa og tidlom ang presyo sa lana.
***
Di pa ni mao. Nipasidaan ang mga eksperto sa lana nga mahimong magpadayon ang pagsaka sa presyo sa lana sa mosunod nga mga semana tungod sa pagtuman sa mga sakop sa Organization of Petroleum Exporting Countries (OPEC) nga gipangulohan sa Saudi Arabia ug sa non-OPEC countries nga gipangulohan sa Russia sa kauyonan pagpadayon sa laslas sa ilang produksiyon hangtod sa Disyembre karong tuiga.
Gitumbok sab nila ang padayon nga pagsaka sa kalibotanong demanda ug ang posibleng mas dakong pagtidlom sa produksiyon tungod sa mga krisis sa Venezuela, Libya, ug Nigeria.
***
Sa pikas nga bahin, may mga eksperto sab nga nipadayag og pagsalig nga hapit na mosangko sa kinutoban ang pila na ka buwan nga sunudsunod nga pagmahal sa lana tungod sa duha ka hinungdan:
•Mahimong molig-on pagbalik ang Amerikanhong dolyar kansang pagtibugsok sa niaging mga buwan mao'y nakapataas sa demanda ug sa presyo sa lana; ug
•Nakabuylo na sab ang produksiyon sa shale oil sa Estados Unidos dinasig sa mas dakong ginansiya gikan sa mas taas nga presyo.
Apan bisan unsa pa ang dangatan sa presyo sa lana sa merkado sa kalibotan, mas dako gihapon nga patong ang excise tax sa krudo, gasoline, ug ubang produkto sa lana di lang karong tuiga kon dili hasta na sa 2019 ug 2020.
Nga seguro nang mopasaka sa plitehan sa mga sakyanang pamasahero, mahimong aprobahan sa Land Transportation Franchising ang Regulatory Board sunod buwan ug ikapatuman na sa Marso, ug sa presyo sa inadlaw nga palaliton. Ug sobra pang makapapas sa gi-ulog-ulog sa Malakanyang nga dugang take-home pay sa mga mamumuo.