Pagtak-om ug pagtago
Nagpiyesta si Senador Antonio Trillanes sa pag-anamanam og bisto sa labing makapaukyab nga mga bahin sa iyang giingon nga bank accounts ni Presidente Rodrigo Duterte ug sa mga sakop sa iyang pamilya. Ang kapin na sa tuig nga pasangil ni Trillanes giisip unta nga kabahin lang sa hilanat sa niaging kampanya ug nakalimtan na gani sa kadaghanan.
Apan nabantang na sab karong bag-o tungod sa pahibawo sa buhatan sa Ombudsman nga nakabuylo na ang ilang imbestigasyon sa kaso nga gipasaka ni Trillanes batok ni Duterte niadtong Mayo sa niaging tuig.
***
Bisan sa namugna nga lab-as nga nasudnong interes, padung na unta nga mobalik og awop ang isyu human niluwat og pormal nga pamahayag ang Anti-Money Laundering Council (AMLC) nga:
• Di gikan nila ang mga dokumento nga gihuptan nilang Trillanes ug sa Ombudsman; ug
• Ang mga dokumento ni Trillanes sayop ug makalipat kay gipatung-patong ang tanang kuwarta nga nisud ug nigawas sa bank accounts.
Apan sa mga hinungdan nga siya ra ang nahibawo gilugwayan ni Presidente Duterte ang lahutay sa eskandalo pinaagi sa pagkumpisal nga gikan gyud diay sa AMLC ang mga dokumento nilang Trillanes ug sa Ombudsman.
***
Masuk-anon nga niinsistir si Duterte nga di angay nga tuohan ang mga gipanulti nila ni Trillanes ug Overall Deputy Ombudsman Melchor Arthur Carandang kay:
• Ilegal nilang nakuha ang kopya sa bank accounts nga kinawat sa kabit sa usa ka koronel gikan sa buhatan sa AMLC; ug
• Gimaniobra na ang entries sa bank accounts aron pagpaburot pag-ayo sa katigayonan niya ug sa iyang pamilya.
***
Si Presidente Duterte ang labing nahibawo nga ang labing laktod nga paagi sa pagmatuod nga namakak silang Trillanes ug Carandang ug nga gimaniobra ang bank accounts nga ilang giwara-wara mao ang pag-abli sa iyang bank accounts, nga dugay na niyang gisaad apan hangtod karon wa niya tumana.
Apan duna gyud tingali nakababag ni Duterte, nga nabantog sa pagboluntaryo bisan sa personal na kaayo nga kasayuran nga way nangayo, sa pagtuman sa gibalik-balik niyang pasalig sa pagpakita sa mga magbubuhis sa kagamay ra sa iyang katigayonan. Tingali mao ra sab ang hinungdan nganong hilom siya sa P6.4 bilyones nga kontrabando sa shabu gikan sa China.