Pagdumili sa pagtahan
Day-as, Cordova, Cebu—Dughang Samaran. Mao ni ngan sa usa sa mga bangka nga masulub- on ug nagkabulingit nga naghukdong dinhi sa baybayon nga hingpit nga nahabolan sa lana. Mga mangingisda maoy labing bangis nga naigo sa padayong pagbugwak sa makahilo nga lana gikan sa nalunod nga MV St. Thomas Aquinas 1. Nagnihit pag- ayong isda tungod sa lana ug bisan makatsamba kuwang na lang nga pangayuon ang ilang makuha nga isda, kon may mamalit man.
Bisan ang gagmayng baruto nga abangan sa mga turista nga ganahang magpa- letrato sa katunggan pila na ka adlaw nga wa makabadbad sa ilang gapos. Ang kalaksot sa namantsahang kadagatan kapuhalan lang hait nga inalisngaw sa lana.
Nalimpiyo na untang tibuok baybayon dinhi niadtong Huwebes. Salamat sa daghang mga boluntaryo sa gobyerno ug pribadong sektor nga nagtinabangay paghaw- as sa ataon nga lana nga nagsugod pagdagsa dinhi niadtong Dominggo. Apan dihang nitaob ang dagat gahapon sa buntag nidagsa na sab ang bag- ong kalaworan sa bawod ug napapas ang pasiunang kadaogan paglimpiyo sa palibot.
Wa magsilbi ang giali nga mga sakong abaka nga gipuno sa mga bunot ug sinina nga natigom sa Kapamilya Relief Campaign gikan sa manggihatagon nga mga Sugbuanon. Tungod sa kakusog sa sug sa dagat nalutsan gihapon sa lana bisan ang bag- ong absorbent boom nga gihatod sa 2GO Shipping gahapon sa buntag.
*** Naabtan nakong mga sakop sa Philippine Coast Guard nga gibansay- bansay pagtubag sa nagkalainlaing hulga sa kinaiyahan uban sa kasundalohan ug kapolisan nga namahuway ug nanglingkod ubos sa mga punoan sa kahoy ug ubang mga landong nga bahin. May pipila nga nagtikaw- tikaw pagtaod og bag- ong absorbent boom. Apan pulos sila masulub- ong nagtan- aw sa di nila kapugngan nga bag- ong lana nga nidagsa.
Matud sa ilang kadagkoan namahuway sila samtang nagpaabot sa dugang mga sangkap paghimo og dugang indigenous spill booms. Apan pipila ka sakop niingon nga mausik lang ang ilang kahago kon di pa hingpit nga masampongan ang buslot sa tangke sa lana sa nalunod nga barko.
Apan inay motahan, gipasaligan ni Ensign Precious Lonie Zamora ang iyang kaubanan nga wa makawang ang ilang trabaho. Gipakita niya nako nga bisan nalutsan ang ilang booms sa kakusog sa sug namilit ang lana gikan sa kalaworan atol sa taob ug namilit sang lana gikan sa daplin atol sa hunas. Bisan sa ilang limitasyon naibanan ang lana. Kinahanglan lang nilang kagison matag karon ug unya ang lana nga namilit sa booms. O ilisan gyud og bag-ong booms kon hingpit nang maitom.
Nagdumili si Zamora pagtakda og panahon pagsulbad sa krisis. Apan mas masaligon niyang kaubanan, nga beterano sa mas dakong oil spill sa Guimaras niadtong 2006, nipasalig nga masuyop nang lana sa mosunod nga tulo ka semana.