Partido ni Rama
Kon hangtod karon nagduda ka pa unsay politikanhong partido nga pasilongan ni Cebu City Mayor Mike Rama sa iyang pagpapili pag-usab sa piniliay sa Mayo sunod tuig, nagusik ka sa imong panahon pagsabot sa nagkasungi ug dugayuyamot-mahuman niyang sinultihan, inay motutok sa iyang body language.
Gisultihan ug gipasabot ni Rama ang tanang nakalahutay pagpaminaw niya nga matinud-anon siya nga sakop sa Liberal Party (LP), ang partido ni Presidente Noynoy Aquino. Lahi sa mga sakop sa Bando Osmeña Pundok Kauswagan (BO-PK) nga gipangulohan ni Kongresista Tommy Osmeña. Kinsa niinsistir nga wa kinahanglana sa BO-PK ang LP sa pagdaog sa umaabot nga piniliay.
*** Apan lahi ang gisulti sa mga lihok ni Rama. Kusganon niyang gisaway ang mga lagda ni DILG Secretary Jesse Robredo, ang executive vice president sa LP. Apil sa ilang gilalisan ang liderato sa Cebu City Fire Department. Sa pipila ka higayon nga niduaw ug nagpahigayon og mga tigom si Robredo sa Sugbo, wa dapita ug labaw nang wa motambong si Rama.
Gikiha sab ni Rama si Finance Secretary Cesar Purisima tungod sa iyang pag-insistir nga makalingkod si Ofelia Oliva isip Cebu City treasurer. Di opisyal sa LP si Purisima apan ang kaso nagmatuod nga way bilib si Rama sa mga tinudlo ni Presidente Aquino.
*** Wa sab managana si Rama pagsukwahi sa mga lakang sa presidente mismo. Atubangan sa kusganong pagdasig ug hingpit nga pagpaluyo ni Aquino sa impeachment ni kanhi chief justice Renato Corona, nideklarar si Rama nga way sukaranan ang mga pasangil batok ni Corona. Gikuwestiyon pa gani niya ang pagka konbikto sa midnight appointee ni kanhi presidente Gloria Arroyo.
Maong way nahibung nganong si Kongresista Osmeña, di si Rama, ang nakatungtong sa entablado uban ni Presidente Aquino sa Danao City niadtong Sabado. Masabot sab nga wa maghigwaos si Rama sa paghangop ug pakiglamano sa presidente kansang mga tinudlo ug mga baruganan kusganon niyang gisupak.
*** Kon bugnaw pa sa simod sa itoy ang tinagdan ni Rama kang Aquino, labihan niya kamadasigon matag duaw ni Bise Presidente Jejomar Binay sa Sugbo. Tam-is kaayong iyang pahiyom nga mosugat, mohangop ug magkuyug-kuyog ni Binay.
Maong klaro na unsay politikanhong partido ni Rama sa iyang pagpangayo og lab-as nga tulo ka tuig nga termino gikan sa mga Sugbuanon. Wa nay duda nga mosunod siyang Gobernador Gwen Garcia pagpanumpa sa United Nationalist Alliance (UNA).
May daotan hinuong balita si Kongresista JV Ejercito, opisyal sa UNA, dihang nahinabi sa Arangkada sa DYAB Abante Pa, Bisaya! gahapon sa buntag: Wa silay plano nga mopaluyo og lokal nga mga kandidato. Sa ato pa, gawas nga seguro na si Rama nga mosabak ni Binay, kuyaw pa gyud siya nga mabitay.
*** Email: leo_lastimosa@abs-cbn.com