Suhol sa BPAT dugay madawat
Kining force multipliers sa kabarangayan nagdawat og suhol o honorarium nga direkta sa Cebu City Hall nga ubos kaayo sa minimum nga suholan apan, ang mas nakapaet kay dugay pa kini nila madawat.
Kini sama pananglitan sa Barangay Peacekeeping Action Teams (BPAT) kinsa kaabag sa pagpatuman sa peace, order ug safety sa grassroots level, ang barangay, apan ang ilang ‘suhol’ direkta gikan sa City Hall.
Taliwala sa kagamay sa suhol o allowance, gidaginot sa mga kabos, matod pa, maayo na lang kaysa sa wala. Gawas pa, makatabang usab sila sa barangay ug importanteng mga kalihukan sa dakbayan.
Ug sila ang daling matawag sa mga opisyal alang sa bug-at nga mga gimbuhaton bisan ubos sa kainit sa panahon o ting-uwan.
Dihay daghang higayon nga dili pakan-on sama sa ubang BPAT nga nadestino sa pag-ayuda sa miaging Central Visayas Regional Athletic
Association (CVIRAA) meet sa dakbayan sa Sugbo. Ang kapulisan dunay gahin nga pagkaon apan wala alang sa ubang force multipliers, naglaway sa daplin.
Matod pa, dihay higayon nga gipadampas sila sa usa ka bahin sa South Road Properties (SRP) sa miaging tuig apan ang ilang sud-an sa paniudto sardinas. Dili nato masabtan kon ingon ba niini ang pag-atiman sa mga kabos.
Dunay ilang suhol nga matanggong og di mominos tulo ngadto sa upat ka buwan. Unsa way budget? Kinsa kaha ang naglangaylangay niini diha sa City Hall? Nganong wa kini maatiman sa nagdumala sa grupo?
Hinaot nga makaamgo ang hingtungdang mga opisyal sa gidangatan ni Mayor Michael Rama nga gipahamtangan og preventive suspension sa Ombudsman tungod sa kaso nga dunay kalambigitan sa suweldo.
Maayong dili pasagdan ang mga yano nga kawani sa City Hall. Kay kon maghiusa sila sa pag-alsa, makatandog ang ilang pwersa.