JERUSALEM VS. COLLAZO
Pormal nga gimando sa World Boxing Organization (WBO) nga depensaan sa bag-ong WBO minimumweight champion Filipino Melvin Jerusalem ang iyang korona batok kang Oscar Collazo sa Puerto Rico.
Gitagalan sa WBO hangtod karong Pebrero 14, 2023 ang duha ka mga kampo aron maeskedyul ang away ug dili na kinahanglang moagi og purse bidding.
“Please be advised that the WBO World Championship Committee is hereby ordering the commencement of negotiations for the subject matter bout,” pamahayag ni WBO Championship Committee chairman Luis Batista-Salas nga napatik sa www.boxingscene.com.
“The parties herein have 15 days upon issuance of this letter to negotiate and reach an agreement accordingly. If an accord is not reached within the time
frame set forth herein, purse bid proceedings will be called per WBO Regulations of World Championship Contests.”
Si Jerusalem, kinsa gidumala sa Sanman/Zip Boxing, adunay 20-2, 12KOs nga rekord samtang si Collazo, kinsa sakop sa Promociones Miguel Cotto, adunay 6-0, 4KOs nga rekord.
Kon rekord ang hisgutan, tataw ang bintaha ni Jerusalem apan dili kini maoy angay basihan gumikan kay adunay saktong abilidad si Collazo.
Nahimong WBO minimumweight No. 1 contender si Collazo human sa iyang impresibong unanimous decision nga kadaugan batok sa beteranong Pinoy nga boksidor nga si Vic Saludar niadtong Hulyo 16, 2022.
Gisundan kini ni Collazo og makapaukyab nga 5th round knockout nga kadaugan batok kang Mexican Yudel Reyes niini lang Enero 28, 2023.
Sa iyang bahin, si Jerusalem nilangkat sa WBO title pinaagi sa makapakugang nga 2nd round TKO nga kadaugan batok kang Masataka Taniguchi niadtong Enero 6, 2023 sa Osaka, Japan.