P100M drugas ang nasakmit sud sa 40 ka adlaw ni Bearis sa PRO 7
Moabot sa P100 milyunes nga balor sa ilegal nga drugas ang nasakmit sa Police Regional Office (PRO) 7 sukad nilingkod sa katungdanan si Police Brigadier General Jerry Bearis isip direktor takdo nga 40 ka adlaw kagahapon, Enero 30, 2023.
Matud ni Police Lieutenant Colonel Gerard Ace Pelare, tigpamaba ni Bearis, nga sa maong gidugayon nakalusad na sila og kapin sa 800 ka anti-illegal drug operations nga niresulta sa pagkasikop sa kapin usa ka libo ka drug personalities.
Gipasabot ni Pelare nga resulta kini sa pagpatuman sa bagong estratehiya sa anti-illegal drug operation nga ilang gikopya sa Israel nga mao ang Center for Public Safety Analysis diin ang tanang downline sa mga nadakpan ilang masayran ug masikop sa follow-up operations.
Sa maong gidaghanon, ang labing dunay daghang nasakmit nahitabo sa usa ka semana nga accomplishment sa PRO-7 gikan sa Enero 23-29, 2023, diin nakakuha sila og kapin sa walo ka kilo sa gituohang shabu nga dunay standard drug price (SDP) nga P54.7 milyunes ug nakasikop usab sila og 283 ka drug personalities.
Nag-una ang Cebu Police Provincial Office nga nakasakmit og ilegal nga drugas nga balor og P18,857,760. Nakasikop usab sila og 78 ka drug personalities samtang 156 ang ilang na file nga mga kaso sa korte.
Gisundan kini sa Cebu City Police Office (CCPO) nga nakasakmit og kapin sa duha ka kilo sa gituohang shabu nga mobalor og P14,844,060. Nakasikop og 51 ka drug personalities sa 47 ka anti-illegal
drug operations. Dako usab og natabang sa ilang kampanya batok sa ilegal nga drugas ang One Cebu Inter-Agency Interdiction Task Force ug nagtuo sila nga duna pay daghang ilegal nga drugas nga masakmit sa mosunod nga mga adlaw.
Nunot sa subsub nga kampanya batok sa ilegal nga drugas, niubos ang mga krimen sa tibuok rehiyon og 22 porsiyento itandi sa samang buwan sa miaging tuig.
Gipasalamatan sa PRO 7 ang publiko nga maoy dako og natampo sa ilang kalampusan sanglit sila ang naghatag sa tanang mga impormasyon labot sa mga kriminal sa ilang palibot.