Grupong magtukod og skyway sa Lapu-Lapu milagda og MOU

Ang proponents sa Lapu-Lapu Expressway (LLEX), nailhan usab nga skyway project, nipirma og memorandum of understanding sa Chinabased company aron makatabang sa pagtukod niini.

Ang LLEX Corp. nga gilangkuban sa Premium Megastructures Inc., Ulticon Builders Inc. ug MTD Philippines Inc. mipirma sa MOU uban sa China First Highway Engineering Co., Ltd. (CFHEC) niadtong Lunes, Enero 30, 2023.

Si Lapu-Lapu City Mayor Junard

“Ahong” Chan, kinsa nitambong sa kalihukan, uban sa iyang asawa nga si LapuLapu City Lone District Rep. Ma. Cynthia “Cindi” Chan, niingon nga ang CFHEC naila sa paghimo og mga proyekto sa imprastraktura sa transportasyon sama sa skyway o

expressway sa China. “Murag nakig-joint venture ba ang proponent,” matud ni Chan sa SunStar Cebu.

Si Bise Mayor Celedonio “Celsi” Sitoy una nang niingon nga ang P24.8 bilyunes nga skyway project gipaabot nga sugdan og trabaho sa

Marso ning tuiga.

Apan sa Enero 30, si Chan niingon nga ang pagtukod lagmit magsugod sa Septiyembre.

Sa pagkakaron, ang mayor niingon nga nagpadayon pa ang alignment sa skyway nga molanat og labing menos unom ka buwan.

“As much as possible nangita tag paagi nga wala tay maigo nga balay,” matud niya.

Ang LLEX magkonektar sa Cebu-Cordova Link Expressway, nga motapos sa Barangay Gabi, Cordova, ngadto sa Mactan-Cebu International Airport (MCIA) sa Lapu-Lapu City.

Tumong niini nga masulbad ang kahuot sa trapiko sa Isla sa Mactan, ilabina sa dakbayan sa Lapu-Lapu, tungod kay naglantaw kini nga makaserbisyo og dul-an sa 50,000 ka mga sakyanan matag adlaw. Gilauman nga magamit kini sa 2025.

Kini mahimong upat ka lane, 12-kilometros nga toll road.

Si Julius “Jayjay” Neri Jr., general manager sa MCIA, sa sayo pa niingon nga gikinahanglan kaayo nila ang skyway aron mas paspas nga makaabot ang mga pasahero sa airport.

Hinuon gipasabot ni Neri nga wala pa niya makita ang mga detalyadong plano busa dili siya makakomento sa epekto niini samtang gitukod.