Crying in the rain
OLIVER PEPITO FLORES (Katapusan sa pito ka mga gula)
Unya, kalit kong nakahunong sa pasayaw-sayaw taliwala sa uwan kay nakita ko si Andro nga nagtindog sa gawas sa among gate. Wa dayon ko makalihok. Napasinguwan si Andro. Klaro nga nagmagul-anon na sab.
Nganong nagpasinguwan na man sab karon si Andro? Ug nganong naguol na man sab siya? Gilikayan ko na siya apan ning higayona, naluoy ko kang Andro. Miduol ko niya. Giablihan ko ang among gate nga rehas.
“Sulod, Andro. Basa na kaayo ka sa uwan.”
Hinay ang akong tingog. Nagtinutokay mi si Andro. Wa siya mosulod. Gikuptan ko ang iyang bukton.
“Ngano, unsa na man say nahitabo nimo, Andro?”
“Gibuwagan na sab ko ni Shierel. Mibalik siya sa usa niya ka uyab. Giprangkahan na ko niya nga bisan unsaon niya, wa na gyud siyay love nako, Nova.”
Ug mihilak si Andro. Nagsagol ang iyang mga luha ug mga lusok sa uwan nga midagayday sa iyang kaapingan. Ambot ba nga wa man gyud ko makapugong sa akong kaugalingon? Migakos ko kang Andro.
“Maligo ta sa uwan, Shierel.”
Ug sa among lawn, nagkuptanay mi sa kamot si Andro nga naligo sa uwan. Nagpadayon mi paghilak taliwala sa uwan. Ug unya, nagginaksanay mi. Nagkadapat dayon ang among mga ngabil. Wa madugay, gitukmod ko si Andro. Nagsayaw-sayaw ko taliwala sa uwan. Miuban sab sa pagsayaw-sayaw si Andro. Nanggawas mi sa lawn. Nagginukdanay mi si Andro samtang naligo sa uwan. Unya nahiabot mi sa baybayon. Duol ra sa dagat ang among balay. Mitimpasaw mi si Andro sa dagat. Nagginukdanay sa paglangoy. Ug misawom mi. Sa ilawom sa dagat naghinagkanay na sab mi sa mga ngabil. Mituang ang uwan.
“Unsa kining nahitabo nato, Andro?” “Nganong nakigrelasyon man ko sa laing babaye nga ikaw man diay ang akong tinuod nga gihigugma, Nova.”
“Sure ka na ba gyud ana? Basin parehas na sa una nga himuon lang ko nimong panakip-butas?”
Wa na mi maghilak si Andro. “Nakasiguro ko ana, Nova.”
Ug unya nagkaligiray mi si Andro sa balas samtang nagginaksanay ug naghinagkanay sa mga ngabil.