Crying in the rain

(Ikatulo sa pito ka mga gula)

Wa ko makalihok nga misunod pagtan-aw kang Andro nga migawas sa among gate. Bisag nagtalikod apan klaro nga naghilak siya kay nagpamahid man siya sa iyang mga tudlo sa iyang mga mata.

Nakapanglingu-lingo na lang ko.

Human ko makapanghimasaw sa tubig sa banyo nga diha ra sab sa sulod sa akong kuwarto, nagdali kong nag-ilis,. Unya gitawgan ko sa selpon si Shierel. Nagsigeg kiring ang selpon sa akong friend apan wa gyud niya tubaga. Hangtod nga ang operator na ang mitubag nga cannot be reach si Shierel.

Naluoy ko kang Andro, uy. Best friend ko siya ug gusto ko nga magmalipayon siya sa iyang lovelife. Wa man sab siya mosulti nako kon unsay rason ni Shierel nga gibuwagan man siya ani. Paglabay sa tunga sa oras gitawgan kog usab si Shierel. Iya na kong gitubag.

“Didto ko sa CR sa imong unang pagtawag nako, Nova. Gibilin ko sa akong kuwarto ang akong selpon.”

“Aw, mao ba. Diri sa amo si Andro. Nagpasinguwan lang. Naghilak kay imo kuno siyang gibuwagan.”

“That’s true, Nova. Nagtuo ko nga love gyud nako siya pero di man diay. Dunay laing laki nga miabot sa akong kinabuhi. Nangulitawo siya nako ug nasuta ko sa akong kaugalingon nga siya ang tinuod kong gihigugma.”

Way pag-ukun-ukon si Shierel nga mitug-an nako sa tanan. Igo na lang kong nanghupaw. Di kadiktaran ang kasingkasing. Ug misunod lang ang akong friend sa pinitik sa iyang kasingkasing.

“Love gyud ka ni Andro. Imagine giusikan gyud niyag mga luha ang inyong pagbuwag. But I respect your decision. Girl sab ko parehas nimo. Nakasabot ko sa imong tinuod nga gibati.”

“Salamat, Friend, nga gisabot ko nimo.”

Nanglabay ang pipila ka mga adlaw. Wa ko na makita si Andro sa eskuwelahan. Nabalaka ko sa kay basig moundang siya pagtungha. Usa ka hapon, giadto ko siya sa ilang balay. Mingaw ang ilang balay, morag way tawo.

Apan nakita ko si Andro nga naghinuktok sa ilang terrace. Nakita sab ko niya.

(SUMPAYAN)