Cha-cha sa pandemiya

M ‘ aking bets in a burning house.”

Mao ni ang labing husto nga ikahulagway nato sa tuyo sa atong nasudnong mga magbabalaod nga usbon ang Konstitusyon karong panahona.

“Making bets in a burning house” nagpasabot nga nagkalingaw sila og pustahanay sa usa ka butang nga walay hinungdan samtang nagka-anam og grabe ang problema sa ilang palibot.

Ania ang Covid-19 nga pandemiya. Daghan na ang mga nangamatay gumikan ning maong balatian.

Wa pa tay bakuna alang sa Covid-19. Wala pa ta huwasi sa kakulba nga matakbuyan simbako ning maong balatian. Apan aniay walang kakuwenta-kuwentang talahuron nga mga sakop sa Kongreso nga nagplano na usab nga usbon ang Batakang Balaod nga unta dili man kini dinalian nga problema ug dili “between life and death” sama sa Covid-19 nga atong giatubang karon. Wrong timing.

Ug karon buot nilang usbon dayon ang unsay naabot sa ilang paminsar nga mas maayong mga probisyon. Aber, aduna bay record kining atong mga magbabalod nga nagpakita sila sa ilang maayong laki, nga ang kadaghanan kanila nadala man lang sa mando sa Malakanyang? Ang unang sugyot nga mo-convene ang Kongreso ngadto sa Constituent Assembly aron usbon ang Batakang Balaod nga wala gani nila giplastar kon unsang mga probisyon ang angay nga usbon.

Naglalis pa sila kon unsang matang sa proseso nga sagupon sa pag-amendar sa Konstitusyon, Constitutional Convention (Concon) ba o Constituent Assembly (Con Ass), kanang silang mga Kongresista ug senador lang ang mousab. Ang laing paagi sa pag-amendar mao ang People’s Initiative. Ang lain nilang gilalisan mao ang amendment ra ba o revision gyud.

Tinuod nga daghang angay amendahon sa atong Batakang Balaod aron masubay sa tukma ug kasamtangang panahon. Ang Konstitusyon sa Amerika, ka-27 ka higayon nang na-amendar. Apan dili pa angay i-Cha-cha karon kay anaa pa kita sa pandemiya. Adunay tukmang panahon sa dili kaayo importanteng mga butang.