I don’t want to let this go

Nindot ang among smile sa usag usa samtang nagkanta ming tulo og born free, usahay kami si Raul ang magkatinan –away. Ug usahay kami sab si Roel ang magkatinutokay. Parehas ming tulo nga nindot og tingog, ug parehas sab nga ang kantang Born Free ang usa sa paborito namong kanta. Ma-feel man gud namo sa lyrics ani nga duna mi kagawasan, nga gipanganak ming may freedom sa unsa man nga gusto namong buhaton, sa bisan unsa man nga among bation.

Parehas sa feeling nila ni Raul ug Roel diri nako. Duna silay kagawasan nga mahigugma nako. Ug ako sab dunay kagawasan sa pagpili kanila. Aw, depende ra gyud sa pinitik sa akong kasingkasing. Kon kinsa man ang akong higugmaon nilang duha, sure ko nga di ko niya pahilakon ug pasakitan.

Human sa among pagkanta, nag-aper ming tulo. Malipayon kaayo mi samtang nagtapad pagyaka sa Bermuda grass sa among lawn.

“Sus, sure gyud ko nga nindot ang tingog sa atong anak someday, Marlene.” Nagtingsi si Raul nga nagtutok nako.

“Kon ako sab ang imong mabana, Marlene, segurado kong pang-recording artist ang boses sa atong anak.”

Mao sab si Roel, dako kaayog pahiyom. Igo ko lang silang gipakiboan sa akong mga abaga. May rason man sab sila. Bisan kinsa kanila ang mahimo kong partner sa kinabuhi, maayo gyud ang tingog sa among anak tungod sa maayong kombinasyon sa among tingog.

“Di pa ta angay maghisgot anang kaminyuon, uy. Nia pa ta sa atong pag-eskuwela. Nangita pa ta sa maayo natong future.”

Nagkadungan pagtando ang duha nako ka suitors.

Nanganta na sab ming tulo. Love song nga tinagalog ang among gikanta. Dasig kaayo ming tulo. Namauli sila si Raul ug Roel nga nagbilin og kalipay nako. Ug nakaseguro sab ko nga malipayon sila.

Sa akong paghigda sa akong kuwarto niadtong gabhiona, way laing nasulod sa akong hunahuna kondi sila ra si Roel ug Raul. Morag gusto na kong mopili nilang duha. Morag ang pinitik sa akong kasingkasing nagtug-an na kon kinsa kanilang duha ang labaw kong gihigugma.