MAYWEATHER JR. NAGKAPURDOY NA?
Tinuod man o dili, apan kusog karon ang hugon-hugon nga ang retired boxing superstar nga si Floyd Mayweather Jr. ang nagkapurdoy na.
Tungod niini, ang gianggaan og "Money," nagtinguha na nga mobalik og saka sa ring.
"Has ‘Money’ gone broke?” matod pa sa usa ka artikulo sa FOX Sports, nga na-post sa niaging mga adlaw.
Ang 43-anyos nga Mayweather nga may 50-0 nga record hilig kaayo nga moplastada sa iyang kuwarta ug way tihik-tihik nga mogasto.
Gikan sa iyang private jets ngadto sa iyang mga mansion, mga luhong sakyanan ug gold, ang undefeated boxer nagpuyo nga buhong sa bahandianong kalipay ang iyang kinabuhi.
Ning bag-ohay lang, ang iyang net worth nga napatik sa
online moabot og $505 million ug gidudahan nga daw og sa hinayhinay na kining nahanaw.
Ang iyang pagpabayad og $1,400 sa iyang mga fans alang sa usa ka online meet-and-greets naghatag og timailhan sa iyang pagbalik og saka sa ring.
Hinuon, daghang mga away nga iyang kapili-an nga mokita og dakong kuwarta. Kini naglakip sa iyang pagpakig rematch ni Manny Pacquiao diin gituohan nga makakuha siya og $200 million.
Subay niini, ang tag-iya sa Premier Boxing Champions nga si Al Haymon nagtuo nga aduna gyuy mahitabong rematch tali ni Pacquiao, ang super WBA welterweight champion ug ni Mayweather. Ang tinubdan nagkanayon nga ang krisis nga nakaapekto ni bisan kinsa karong panahona, lakip na ni Mayweather maoy makapaaghat sa nauwahi nga moaway og balik.
Gikataho usab nga dili igbali ni Haymon nga mogasto siya og gatusan ka minilyon sa higayon nga mahibalik na sa normal ang sitwasyon sa tibuok kalibutan.
Dunay mga taho nga ang boxing mobalik karong Hunyo sa pipila ka mga dapit sa US ug Europe apan ubos sa pipila ka mga kondisyones. Usa na niini nga limitahan ang manan-away. Lakip sa mga dagkong pangalan nga gikonsiderar nga makaagni og daghang manan-aw mao sila Pacquiao, Triple G, Canelo, Errol Spence ug Anthony Joshua.
“Everyone's hoping and praying this ends soon,” matod sa tinubdan.
Sa iyang bahin, si Pacquiao nagplano nga moaway sa Saudi Arabia sa Hulyo diin si Mike Garcia maoy nag-unang kandidato nga iyang makontra. Sa dihang nakadungog nga si Mayweather mibalik na sa iyang ensayo, si Pacquiao daling mipabuhagay nga wala pay klaro kon kinsa ang iyang makontra sa sunod niyang away, dala ang pasumbingay nga magdepende lang siya ni Floyd. Ang 41-anyos nga Pacquiao wala pa makaaway sukad sa iyang kadaugan ni Keith Thurman didto sa Las Vegas niadtong Hulyo sa niaging tuig.