Dino: Cebu City maoy labing preparado batok sa Covid-19

Gihulagway ni Presidential Assistant for the Visayas Secretary Michael Dino nga ang dakbayan sa Sugbo maoy labing preparado sa tibuok Pilipinas labot sa pagpangandam batok sa Covid-19.

Ang alter-ego ni Presidente Rodrigo Duterte nibuhi sa maong pamahayag human gibendisyonan niadtong Sabado, Abril 25 ang kapin P50 milyones nga Cebu City Quarantine Center (CCQC) sa North Reclamation Area nga mopahiluna og 166 ka mga pasyente.

“We are the most prepared.

We will show Cebu City or we will show to the entire nation that Cebu City will be a rule model towards the future towards a new normal,” padayag ni Dino.

Gawas sa CCQC, ang Cebu City adunay Bayanihan Center, International Eucharistic Congress hall nga mosulod og 250 ka mga symtomatic Covid-19 positive kinsa adunay mild ug moderate nga timailhan.

Giwitkan usab ni Dino kadtong mga kritiko sa mga mayor dili lang sa dakbayan kon dili sa tanang mga local government unit sa paghilom kon walay ikatabang nga maayo.

“Kining mga leaders nga naa diri let us just do what we are going to do, honestly speaking if you do not do anything, reklamo if you do something reklamo. Judge your leaders after, lets cooperate now and let us judge after, magpa-judge me ninyo. Tan-awon nato unsay nabuhat nako. Katong sige reklamo unsay nabuhat nila, magkomparahay ta og notes. As of now, let’s work as one,” dugang sa alter-ego ni Duterte.

Si Dino niawhag usab sa mga lider nga maghiusa niining panahon sa krisis ug kon walay maayong masulti labing maayo nga maghilom ug hukman ang mga mayor human sa krisis base sa ilang nahimo.

“Kung wala moy masulti nga maayo paghilom sa, we work to be judged after, because dili pwede ang atong mayor diri ang mga mayor sa katawhan dili pwede ma-derail tungod lang anang saba kaayo diha,” padayag sa OPAV chief.