Grandslam title campaign ni Standhardinger nabuhi
Human gi-trade sa San Miguel Beer ngadto sa NorthPort Batang Pier, giangkon ni Christian Standhardinger nga gusto gyud unta niya nga malakip ug makatabang sa Grandslam campaign sa Beermen.
Ang wa damhang desisyon sa coach ug sa management maoy hingpit nga napapas sa iyang damgo.
Apan niadtong Miyerkules sa gabii, nabuhi ang paglaom ni Standhardinger nga personal nga makaangkon og Grandslam title sa iyang kaugalingon.
Kini human nga ang NorthPort nakalangkat og luna alang sa semifinals round sa PBA Governor's Cup pinaagi sa ilang makutas nga kadaugan batok sa no. 1 NLEX Road Warriors, 126-123, sa tulo ka overtime.
Sa maong duwa, ang FilGerman nga forward mitali og 33 punts ug 23 ka rebounds sulod sa 61 minutos ug dos segundos nga maoy pinakataas nga oras sa local player sud sa usa ka duwa.
Si Standhardinger adunay duha ka championship sa karon nga season ubos sa San Miguel Beer apan gi-trade sa tungatungang bahin sa Governor's Cup sa NorthPort bugti ni Mo Tautuaa.
Ang Beermen, sa ilang bahin, gitaktak sa Barangay Ginebra sa niaging semana nga maoy hingpit nga nagwagtang sa ilang paglaom nga maka Grandslam pa.
Hinuon, gipadayag ni Standhardinger nga wala kini sa iyang hunahuna kay siya mismo sayod kon unsa kalisod buntogon ang Ginebra nga maoy ilang makontra sa best-of-five semis.
“I’m not thinking about it,” matod ni Standhardinger. “Ginebra is an amazing team and, for me, the team to beat in this conference,” matod ni Standhardinger nga nakutlo-an sa Spin.ph. “To be honest with you, I’m so happy about making top four with this team. We are a young team. We just got together one and a half months ago. This is huge.” Sugdan ang NorthPort-Ginebra series sa Disyembre 14.