16-ANYOS TINUN-AN MILAYAT SA FERNAN BRIDGE, PATAY
Human gialarma sa iyang pamilya ug kabanay nga na missing, ang biktima napalgan apan wala nay kinabuhi nga nag utaw-utaw sa Mactan channel sa Cabahug Shipyard sa Barangay Opao, siyudad sa Mandaue.
Nailhan ang biktima nga si Christian Joseph Lumapas, 16, dalan taga R. Colina, Barangay Ibabao,siyudad sa Mandaue.
Ang iyang ngalan ug panagway unang nag-viral sa social media bahin sa panawagan sa pamilya.
Si Police Colonel Jonathan Abella, hepe sa Mandaue City Police Office (MCPO), pasado alas 11:00 gahapon sa buntag Agusto 18 nakadawat og tawag ang Opao Police Station labot sa patayng lawas nga naglutaw-lutaw sa dagat.
Dali nila kini nga girespondehan ug sa gihimong imbestigasyon nailhan ang biktima pinaagi sa iyang coach sa basketball sa Ateneo de Cebu Julius Tapia nga ang namatay mao si Lumapas.
Tungod niini, nhimo dayon ang kapulisan og pakisusi kung unsay posibling nahitabo sa biktima.
Gipa-review nila ang mga kuha sa CCTV camera sa unang taytayan sa Marcelo Fernan Bridge ug dinhi nakita nga miambak kini mga alas 2:00 sa kaadlawaon sa Dominggo, Agusto 18.
Nakita usab sa CCTV nga nag sakay ang biktima sa habalhabal gikan sa Banilad Town Center diin minaog kini sa tiilan sa taytayan ug nagbaktas paingun sa tunga-tunga ug pipila ka minutos ang naka labay miambak na kini sa dagat.
“Makita namo sa CCTV nga nilayat na mga alas 2 sa kaadlawon kay gipa-trace man nako, nag sakay siyag habal-habal nagpa-drop sa may bridge nya nag baktas paingun sa tungatunga pag after ni layat,” matod ni Abella.
Dili pa nila matino kung unsay hinungdan sa pag-ambak sa biktima nga maoy hinungdan nga makig alayon sila sa pamilya lakip na sa mga kauban niini sa wala pa mahitabo ang insidente.
Wala pa matino kinsa ug unsay gihimo sa biktima sa Banilad Town Center apan makigtagbo ang mga imbestigador sa mga barkada niini kung aduna bay problema nga gihambin ang biktima.
Inila sa sugbo ang pamilya ni Lumapas gani niadtong Biyernes, Agusto 17, nag-post pa kini sa Facebook nga nangita sa biktima.
Ang kapulisan usab nga naka basa sa maong mensahe mipaalerto usab sa tanang police station sa tibuok isla sa Sugbo aron makit-an kini.