Balaod sa nationwide liquor ban?
Usa ka bana nibadlong sa iyang asawa kay dako na’g gasto sa sigig adto sa beauty parlor. Tubag sa asawa, “Sagdi lang ko, love. Para pirming guwapa ko ug ganahan ka nako. Ikaw bitaw, dako man sab ka’g gasto sa sigi’g inom.” Matod pa sa bana, “Pareho ra ta, honey. Moinom ko para moguwapa ka.”
Samtang usa ka bartender nakabantay sa usa ka customer nga kada human og inom sa usa ka boteylang beer, mokuha sa iyang pitaka ug motan-aw sa letrato sa iyang asawa. Wa siya makaagwanta, busa iyang gipangutana ang customer bahin niini. Tubag sa customer, “Kon moguwapa na gani ang akong asawa, mopauli na ko.”
Pipila lang kini sa mga pasiaw nga gihimong sumsoman sa mga palainom. Kadtong moinom, gusto nila nga ang tanang tawo manginom sab. Apan kadtong di moinom, gusto sab nga ang tanan di manginom.
Nidaog ang mga di manginom didto sa Estados Unidos ug gipatuman ang Voisted Act nga nagdili sa paghimo, importasyon, transportasyon ug pagbaligya sa mga alcoholic beverages gikan sa 1920 hangtod sa 1933. Mao kini ang Prohibition, ang 18th Amendment sa US Constitution.
Apan ang gustong moinom wa mangundang. Nahimong underground ang pagbaligya sa mga ilimnong makahubog ug mitumaw ang mga sindikato nga gikontrolar sa mga gangsters sama ni Al Capone. Gi-repeal ang Prohibition pinaagi sa 21st Amentment.
Dunay balaudnon nga gipasaka sa House of Representatives nga magpatuman sa ban sa pagbaligya ug pag-inom sa mga ilimnong makahubog sa tanang mga pangpublikong lugar sa tibuok nasud sama sa kadalanan, pathways, plazas, alleys, aseras, parks ug mga parking areas.
Ang House Bill No. 3047 nga gipasaka ni Quezon 4th District Rep. Angelina D.L. Tan, usa ka medical doctor, nagdili usab sa pag-inom og alcohol sa tanang mga establisimiento gikan sa alas dose sa tungang gabii hangtod sa alang otso sa buntag.
Apan tugotan ang mga restaurants, clubs, hotels, retail stores, supermarkets, fastfood chains, canteens, cafés, bar ug cocktail lounges sa Metro Manila, mga highly urbanized areas ug special economic zones sa pagbaligya ug pagsilbi og alcohol hangtod sa alas dos sa kaadlawon.
Si Tan, ang chairperson sa House committee on health, niingon nga ang alcoholism ug violence nahimong mahinungdanon nga mga public health issues nga kinahanglang tagdon dayon. Ang data sa World Health Organization, matod niya, nagpakita sa tulo ka milyon ka mga tawo ang mamatay kada tuig tungod sa alcohol consumption.
Niingon siya nga nunot usab kini sa programa ni Presidente Rodrigo Roa Duterte sa pagkontrolar sa krimen.