ROCKETS MITIPI SA WARRIORS
Bisa’g wala ang ilang lider nga si James Harden, ang Houston Rockets, sa gihapon, nakapasulbong sa ilang open sa aron pakagingon ang host Golden State Warriors, 118-112, kagahapon sa NBA.
Si Harden, ang kasamtangang MVP, wala nakaduwa gumikan kay nagsakit ang liog ug gisip-on usab kini. Wala man tuod si Harden apan naa si Chris Paul, kinsa nakagiya og insakto sa Rockets gikan sa pagsugod sa duwa. Gawas sa iyang 23 puntos nga natampo, si Paul nakahimo sab og 17 ka assists nga timailhan lang kon giunsa niya pag-agak ang iyang mga kauban ning malisod nga tahas. Ang Rockets gipangulohan ni Eric Gordon pinaagi sa iyang 25 puntos lakip na niini ang upat ka three-point shots, nidugang og 20 puntos si Kenneth Faried samtang niamot og 18 puntos si P.J. Tucker. Ang Warriors, nga maoy two-time defending champions, gipangulohan ni Kevin Durant 29 puntos, 25 puntos gikan kang Stephen Curry ug 20 puntos ang natampo ni Klay Thompson. Nagpabilin hinuon gihapon sa liderato sa Western Conference ang Warriors dala ang
42-17 nga rekord taliwala sa kapildihan samtang napahugtan sa Rockets ang ilang paggunit sa ikalimang luna bitbit ang 34-25 nga baraha.
Pagsugod pa lang sa kombati, tataw nga determinado ang Rockets nga buntogon ang Warriors nga maoy labing lig-on nilang babag sa ilang tinguha nga patigbabawan ang Western Conference.
Ang duha ka mga kampo mao ang nagtagbo sa Western Conference finals series sa miaging season diin munasginhawang milampos ang Warriors sulod gyud sa pito ka mga duwa.
Adunay higayon sa 1st half nga niabot pa og 20 puntos ang bintaha sa Rockets. Hinuon nailog sa Warriors ang labaw sa
3rd quarter apan wala ra magdugay ug nakontrolar pagbalik sa Rockets ang kombati hangtod na sa katapusang gutlo.
Sa laing duwa, padayon nga naghingutas ang Los Angeles
Lakers nga makasulod sa playoffs human kini masugamak na usab og kapildihan kagahapon, ning higayona, sa New
Orleans Pelicans, 115-128. Kini bisan pa man og wala makaduwa si Anthony Davis kinsa igo lang nagtan-aw sa bench.
Si Jrue Holiday mipabuto og lima ka triples sa iyang 27 puntos, midugang og 24 ang kanhi
Laker nga si Julius Randle kinsa daw og sa nadasig sa maong kadaugan nga maoy nagtukmod ni LeBron James ug sa Lakers nga dili makasulod sa playoffs.
Si James mitali og 27 puntos ug 12 ka assists, samtang si Brandom Ingram adunay 29 puntos alang sa Los Angeles nga nagintangan og tulo kaduwa gikan sa katapusang luna sa playoff sa Western Conference.