Hunta sa plano sa DA pag-unregulate sa asukar

Supak ang Sangguniang Panlalawigan sa Sugbo sa gikataho nga plano sa nasudnong kagamhanan pinaagi sa Department of Agriculture (DA) nga i-unregulate ang importasyon sa asukar dinhi sa nasod.

Sa resolusyon nga gipasar sa regular session niadtong Lunes, Pebrero 18, ang Cebu Provincial Board nihangyo sa nasudnong gobiyerno nga dili ipadayon ang maong plano.

Ang PB nipasidaan nga ang dili pag-regulate sa pagsud sa imported nga asukar sa Pilipinas mopakunhod sa gidaghanon sa mapalit nga asukar gikan sa mga farm ug mills sa sugar milling district sa Sugbo.

Si PB Member Horacio Paul Franco sa ikaupat nga distrito sa Sugbo, ang nangamahan sa resolusyon, niingon mahinungdanon nga contributor sa kauswagan sa nasod ang sugar farming ug mill operations.

Sa resolusyon, nasayran nga mokabat sa P90 bilyones matag tuig ang halin gikan sa raw ug refined sugar, molasses ug ethanol ug naghatag og trabaho ngadto sa 700,000 ka mga trabahante sa asukar sa 20 ka sugar-producing nga mga lalawigan lukop nasod.

Sigon ni Franco moabot sa usa ka porsyento ang produksyon sa asukar sa Sugbo nga kinatibuk-ang 400,000 ka mga bag sa brown nga asukar.

Dinhi sa Sugbo, ang sugar milling district naglakip sa mga lungsod sa Balamban, Tuburan, Tabuelan, San Remigio, Medellin, Daanbantayan, Tabogon ug mga siyudad sa Bogo ug Danao nga adunay kinatibuk-ang area nga 7,500 hectares diin ang mga mag-uuma nagtikad sa average nga moubos sa lima ka ektarya.

Sumala ni Franco adunay usa ka galingan sa asukar sa sugar milling district, ang Bogo-Medellin Milling Co., Inc. (Bomedco), nga maoy nag-operate sa raw sugar ug molasses ug ang padayon nga operasyon niini naghatag og kalamboan sa ekonomiya sa maong mga dapit.