Didal nalakip sa Most Influential Teen sa 2018 sa Time Magazine

Ang Sugboanong skater nga si Margielyn Didal nalakip sa Most Influential Teens sa 2018 sa Time’s Magazine.

Ang 19-anyos mga lumad nga taga Barangay Lahug, dakbayan sa Sugbo nakakulit og pangalan human kini makalalangkat og gold medal sa Asian Games sa Indonesia niadtong Agusto.

Si Didal nagsugod pagka skateboarder nga manghuwam lang og skateboard sa iyang mga higala tungod sa kakabus sa ilang pamilya. Pipila usab ka higayon nga gigukod siya og mga tinugyanan sa balaod sa higayon nga mag-ensayo siya daplin sa kadalanan.

Ang dakbayan sa Sugbo mipalabang og ordinansa nga nagdili sa mga skateboarder sa paggamit sa mga sidewalks nga ilang praktisanan, apan sa samang higayon, wala kini luna nga gitagana alang kanila.

Apan bisan pa niini, iyang naaswat ang iyang karera ug hangtod nga nahimong inilang atleta dili lang sa Pilipinas kon dili sa ubang mga nasod.

Tungod sa iyang kaagi, daghan na karong mga bata ang nadasig sa skateboarding ug ingon man naaghat ang siyudad sa Sugbo sa pagtukod og skatepark isp pahinungod ngadto kaniya.

Sa Time Magazine, si Didal namahayag nga tinguha karon niya ang paghatag sa Pilipinas sa unang gold

medal sa Olympic sa 2020 Tokyo Olympics ug tinguha usab niya nga moporma og

mga batan-ong grupo sa mga skaters alang sa bag-o unyang henerasyon.

/ FILE PHOTO ■ INPLUWENSIYADO: Si Margielyn Didal (nga nipahigayon og autograph signing ngadto sa mga bata nga iyang fans, atol sa iyang pagbisita sa Lahug Elementary School, maoy bugtong Pinoy nga nalakip sa 25 nga nalista sa Time’s Magazine isip Most Influential Teen sa 2018.