Sandiganan
Kining paugnat sa kusog, pananglit basketbol o boksing, kulbahinam gyod kaayo ilabina kon ang wala damha nga makadaog maoy makadaog. Makita ni nato sa mga boksingero nga sa sinugdanan nagpunay lang og dawat sa kumo sa ilang kaatbang. Morag pildihunon. Apan sa kataposan siya ang nakapatumba ug nakapakatulog sa pikas boksingero. Dili pa dugay ang basketbol nga pundok sa “University of the Philippines” nakadaog batok sa Adamson. Naglipay ang mga isko ug iska sa wala damha nga kadaogan. Aduna silay gisandigan nga kusog o inspirasyon.
Pagaubanan ang pagbalik sa Anak sa Tawo – si Jesus – og mga katalagman, ang “dahunong sa dagat ug kapintas sa mga balod...ang kagahoman ssa kalangitan pagatay-ogon”. Gihulat pa gani ang pagbalik mismo ni Cristo aduna nay mamatay sa kalisang. Sa laing bahin, “Pagmatngon kamo kay basin maluya ang inyong mga kasingkasing diha sa pagpasagad ug paghuboghubog, ug sa mga pang-adlaw-adlaw nga mga kabalaka ug kadtong adlawa moabot kaninyo nga wala damha sama sa lit-ag,” miingon si Jesus.
Taliwala niining mga makalilisang nga panghitabo, adunay tawag sa paglaom: “Apan inigsugod na pagkahitabo niining mga butanga, barog kamo ug ihangad ang inyong mga ulo tungod kay haduol na ang inyong kalingkawasan.” Gitapos ni Jesus sa mga pulong: “Pagbarog Binasi sa eremias 33:14-16; Salmo 25; 1 Taga Tesalonica 3:12-4:2; Lucas 21:25-28, 34-36 atubangan sa Anak sa Tawo.” Tungod kay makasandig kita sa Anak sa Tawo, dili diay kita malupig sa umaabot nga kalisdanan. Kanang morag malupig na ta, magmadaugon diay kita.
Sa mga Israelita nga gihinginlan ug nagkalisodlisod, gisandigan nila ang saad nga gisulat ni propeta Jeremias: “Pabarugon nako alang kang David ang usa ka matarong nga udyong; magabuhat siya sa katarongan ug matarong diha sa yuta.” Latas sa kasaysayan sa mga Judio ug sa ato usab nga kasaysayan adunay saad ang Ginoo nga atong masandigan. Isilsil nato sa atong alimpatakan nga kitang mga Pilipino pinili sa Dios alang sa misyon sa pagpaambit sa atong pagtuo sa tibuok kalibotan. Ug dili kita biyaan sa Ginoo kay gihigugma kita Niya.
Nag-ampo si San Pablo nga “molambo ug mobuhagay” ang maong gugma ngadto sa mga taga Tesalonica aron malig-on ang ilang mga kasingkasing. Gugma gyod diay ang magpabiling sandiganan ug wala nay lain pa, ni gahom, ni kinaadman, ni kabtangan. Ang hangyo lamang ni Pablo mao nga ang ilang paningkamot nga makapahimuot sa Dios, dugangan pa gyod nila. Kon ang gugma nga madawat pagabalosan og gugma, molambo ang gugma.
Niining unang Domingo sa Adbiyento, mamalandong kita sa gugma sa Dios nga mao ray magpabilin kon magun-ob na ang tanan. Gihatagan ba natog igong luna ang gugma sa Dios sa atong kinabuhi?