Cafgu ginegosyo sa AFP

Ang New People’s Army (NPA) Northern Mindanao Command mipasangil sa Armadong Kusog sa Nasod nga ilang gihimong negosyo ang pagtukod og armed civilian volunteers kinsa mi-abag sa anti-insurgency campaign sa gobiyerno. Matod pa sa ilang press release nga ‘pagpakaminus sa katawhan ang gipasiatab ni Pres. Rodrigo Duterte nga walay bulok kuno sa kurapsyon sa han-ay sa Armed Forces of the Philippines (AFP) tungod kay disiplinado kini. Apan tataw sa katawhan ang kamatuoran nga gikan sa han-ay sa ubos nga ranggo hangtud sa mga heneral sa AFP nalambigit sa lain-laing porma ug gibug-aton sa kurapsyon ug suburno gawas sa mga pagpangabuso pa niini.’

‘Usa sa porma sa dayag nga tinubdan sa kurapsyon sa AFP ang Citizen Armed Forces Geographical Unit (CAFGU) o Civilian Active Auxiliary (CAA).

Gihimong negosyo sa AFP ang CAFGU pinaagi sa tinuyong paglangan sa pag-release sa ilang sweldo sulod sa 3-4 ka bulan. Dinhi sa North Eastern Mindanao Region, kapin sa 100 ang nagbarog nga mga CAFGU/CAA detachments karon, wala pay labot ang mga SCAA sa mga kompaniya sa mina ug plantasyon.’

‘Matag detachment kasagaran adunay 40 ka personnel ang ma-assign nga miyembro sa CAFGU nga gibahin sa duha ka grupo nga magpuli-puli sa pag-duty sulod sa 15-20 ka adlaw matag bulan. Mokabat sa P4,500.00 matag bulan ang suhol niini. Sa ato pa, dili moubos sa 4,000 ang sakop sa CAFGU sa tibuok rehiyon nga may kinatibuk-ang budget sa sweldo nga mokabat sa P18 milyon matag bulan. Sa tulo ka bulan, mokabat na kini ngadto sa P54 milyones o P216 milyon sulod sa usa ka tuig.’

‘Apan gipatubuan ang maong kantidad diha sa mga negosyante ug mangutangay gikan sa 5% hangtud 20% nga interes sa dili pa i-release ngadto sa mga CAFGU ang usa ka bulan nga sweldo. Samtang gipadayon pagnegosyo ang nabiling laing bulan. Busa makahakop ang mga opisyal sa 401st ug 402nd Infantry Brigades, Philippine Army (PA) sa AFP dinhi sa rehiyon sa dili mominus P2.7 milyon–P10.8 milyon gikan sa mga CAFGU sulod sa 3 ka bulan.’