WARRIORS GITUHAK SA RAPTORS
51 puntos ni Durant nausik
Nasugakod sa host Toronto Raptors ang kamangtas nga gipakitang duwa sa usa sa mga pambato sa defending champion Golden State Warriors nga si Kevin Durant aron iposte ang overtime nga kadaugan, 131-128, kagahapon sa National Basketball Association (NBA).
Si Durant nagpakatap og 51 puntos apan nausik lang kini gumikan sa kainit sa duwa sa kinatibuk-ang puwersa sa Raptors nga gipangulohan ni Kawhi Leonard.
Nimugna og iyang season-high 37 puntos si Leonard aron pangulohan ang kadaugan, nitunol og iyang career-high si Pascal Siakam nga 26 puntos samtang niamot og 20 puntos si Serge Ibaka.
Adunay laing tulo ka mga magduduwa ang Raptors nga ningtampo og dobleng numero nga puntos matag usa.
Ang Raptors, nga ning-inat sa ilang sunodsunod nga kadaugan ngadto sa pito, ningsaka sa 19-4 nga rekord aron pahugtan ang ilang paggunit sa liderato sa Eastern Conference samtang ang Warriors ningdakin-as sa ikatulong luna sa Western Conference bitbit ang 15-8 nga baraha.
Ang Warriors, nga padayong ningkombati nga wala ang duha sa ilang mga sinaligan nga sila si 2-time MVP Stephen Curry ug Draymond Green, nakadawat sab og 23 puntos gikan ni Klay Thompson ug 20 puntos gikan ni Jonas Jerebko.
Sayong nanginit ang opensa sa Raptors ug nakaposte dayon kini’g 18 puntos nga labaw, 32-14, sa 1st quarter pa lang.
Human niini, ningmugna og 15-5 nga rally ang Warriors nga gituldokan og three-point shot ni Durant sa nahabiling 8.6 segundos sa regulation period nga maoy nakapugos
sa overtime.
Grabe ka sikit ang kombati sa overtime ug sa himatyong segundos na naseguro sa Raptors ang kadaugan.
Samtang sa laing duwa, giaswat ni LeBron James ang Los Angeles Lakers ngadto sa 104-96 nga kadaugan batok sa Indiana Pacers.
Si James mitapos sa duwa nga may 38 puntos, 12 niini sa katapusang singko minutos sa
duwa, samtang 14 ang naamot Brandon Ingram ug 13 usab ang nadugang ni Josh Hart.
Nakaposte og 24 puntos nga labaw ang Lakers apan hinayhinay kining gikitkit sa Pacers sa wala pa giyahi ni James ang Lakers alang sa ilang ika-10 nga daog sa uwahi nilang 14 ka duwa.
Sa kinatibuk-an, ang Lakers adunay 11-9 nga baraha samtang 13-8 ang sa Pacers.