GREEN LANCERS BATOK COBRAS
Mga duwa karon
5:15 pm- USPF batok CITU (srs) 6:45 pm- SWU batok UV (srs)
Mag-enkuwentro og balik ang kanhi managribal nga University of the Visayas (UV) Green Lancers ug Southwestern University - Phinma (SWU) Cobras sa main game karong gabii sa pagsugod sa
2nd round sa eliminasyon sa Cebu Schools Athletic Foundation Inc. (CESAFI) basket- ball college division sa Cebu Coliseum.
Ang Green Lancers ni coach Gary Cortes ninghuman sa 1st round sa eliminasyon dala ang 3-3 nga rekord, dili angayan alang sa usa ka defending back-to-back champions
nga puwersa.
Apan mas grabe ang kasinatian sa Cobras ni coach Mike Reyes sa 1st round gumikan kay nagbitay kini ikaduha sa labing iwit sa standing dala ang 1-5 nga rekord.
Ang Green Lancers, nga gikan sa 65-72 nga kapildihan batok sa league-leader University of the Cebu (UC) Webmasters, gilaumang mamungot sa Cobras dala ang intensyon nga paamagon ang ilang poruhan sa nagkaduol nga semi-finals.
Ang mopatigbabaw nga upat human sa double-round elimination mao ang makataak sa semi-finals.
Apan kon adunay makaharos og daog sa tanan nilang 12 ka mga tahas sa double-round elimination, ang maong team makaderetso og sulod sa finals unya ang No. 3 ug No. 4 teams magtagakay aron angkunon ang katungod sa pagpakigbatok sa No. 2 alang sa inilugay sa ikaduhang luna sa finals.
Sa kasamtangan, ang Green Lancers nahiluna sa ikaupat nga puwesto sunod sa University of Southern Philippines Foundation (USPF) Panthers (4-2), University of San Jose Recoletos (USJ-R) Jaguars (5-1) ug Webmasters (6-0).
Dili ikalimod nga huyang puwersa sa Cobras ning higayuna kumpara sa nangaging katuigan apan labing seguro, dili kini bastabasta magpapilde bisan kinsa pa ang magbabag sa ilang atubangan.
Human sila nasubhan og dakong kadaugan batok sa Cebu Institute of Technology University (CITU) Wildcats, 87-53, niadtong Agusto 25 atol sa pagsugod sa torneyo, nagkagidlay na ang Cobras ug nasugamak kini sa lima ka sunodsunod nga kapildihan lakip na ang ilang pagkalubong sa Green Lancers, 68-49, sa premiro nilang sangka niadtong Septiyembre 13.
Sa laing bahin, ang Panthers ni coach Alan Cabatingan gilaumang mosubay sa yano nga dalan sa ilang pagpakigsangka sa nangiwit nga Wildcats sa premirong duwa.
Ang Wildcats ni coach Benjamin Alcaraz mao ang bugtong puwersa nga wala nakatilaw og kadaugan sulod sa unom ka mga duwa sa 1st round sa eliminasyon.
Sa mga kombati niadtong martes, gipangbuntog sa Webmasters ang Panthers, 55-45, samtang gipukan sa Jaguars ang Warriors, 101-93.