1.3 KILO SA SHABU
NASAKMIT GIKAN SA MAGTIAYON, 'DRUG LORD', SK CHAIRMAN
Mokabat sa 1.3 kilo nga shabu ang nasakmit sa kapulisan sa Sugbo sa managlahi nilang mga operasyon.
Kini mokantidad og P16 milyunes base sa Dangerous Drugs Board (DDB) value.
Niadtong Martes sa gabii, 1.2 kilo sa shabu nga balor og P14.7 milyones shabu nasakmit sa kapulisan sa Jagobiao Police station sa dan Figueroa, Barangay San Nicolas, dakbayan sa Sugbo.
Nasikop usab ang nailang high value target sa drug watch list sa dakbayan sa Sugbo nga si Adel Rabanes Villafuerte, 40, ug iyang asawa nga si Jasmin, 40.
Lakip sa nadakpan ang usa ka bayot nga si Ronnel Ylanan, 26, taga Basak Pardo, dakbayan sa Sugbo.
Matod ni Police Senior Inspector Rodgene Fudotan, hepe sa Jagobiao Police Station, nga nagsugod ang transaction sa buy bust operation pasado alas 5 sa hapon una sa may Lorega-San Miguel, apan nabalhin sa Pahina Central, dakbayan sa Sugbo.
Ilang unang ka transactiom si Yalanan, diin palitan unta nila og 25 gramos sa shabu, apan kay wa unta niini gihatag ang ilegal nga drugas, nilanat og dul-an sa duha ka oras ang operasyon. Giingong gidala ang poseur
buyer nga usa ka pulis ngadto na sa gawas sa balay sa matod pa ugangan ni Adel sa may Barangay San Nicolas, dakbayan sa Sugbo.
Atol sa pagbinayloay na sa drugas ug kwarta, diin anaa na ang magtiayon, daling nasikop ang tulo, alas 7:10 Martes sa gabii.
Nasakmit gikan kang Ylanan ang buy bust drugs ug ang P10,000 nga marked money.
Nakuha usab gikan kaniya ang pink sling bag, diin aduna kini sud nga laing dakung sachet sa gituohang shabu.
Nakompiskar usab gikan sa posesyon nila Adel ug Jasmin ang tag duha ka nga dagkung pakete sa gidudahang shabu. Diin motimbang ang tanan sa 1.25 kilo sa gituohang shabu.
Dugang ni Fudotan nga usa sa ilang asset ang nihatag sa number ni Ylanan, nga giingong namaligya og ilegal nga drugas sa dakbayan sa Mandaue.
Giangkon ni Ylanan nga nahimo siyang runner sud palang sa tulo ka buwan.
Dugang ni Ylanan nga baguhay lang siya nga nisalmot sa maong illegal nga patigayon tungod sa kawad-on.
Niangkon usab si Adel nga iya ang mga nakuhang illegal nga drugas, apan giingong igo ra usab siya nga hagbungan ug kuhaan sa maong mga butang.
Iyang giklaro nga way apil ang iyang asawa sa ilegal nga patigayon.
Gisegundahan kini ni Jasmin kinsa nibutyag nga igo ra siya gikuha nga kwarta gikan sa iyang bana atol sa operasyon.
Dugang niya nga taud-taud na niyang gitambagan ang bana nga moundang.
“Mao man gani na hinungdan sa among away, kay ako nana siya paundangon ana kay wa gihapoy klaro kwarta kay igo raman siya tawagan nga naay ibilin ug lain sad ang mokuha,” pamahayag ni Jasmin.
Gipasabot usab ni Fudotan nga wa na sila nakahigayon sa pagpakig-alayon sa barangay opisyal sa San Nicolas kay hasta sila ang nakalitan nga naabot na ang transaksyon sa San Nicolas.
SK CHAIRMAN
Sangguniang Kabataan chairman sa Barangya Bayong, Balamban nasikop sa buybust operation sa Provincial Intelligence Branch (PIB).
Ang Cebu Provincial Police Office niingon nga ang nasikop nga SK official maoy responsable sa pagsiaw sa drugas sa Balamban.
Moabot sa 12 ka gramos sa gituohang shabu ang nakuha gikan kang Regie Ponce atol sa gipahigayong buy bust operation sa PIB sa national highway sa Barangay Gaas, Balamban.
Moabot sa P141,000 ang balor sa drugas nga nakuha kaniya.
Matod ni CPPO Director Sr. Supt. Manuel Abrugena, nakadawat sila og report bahin sa ilegal nga kalihukan sa SK official hinungdan nga ila kining giaksiyonan.
‘DRUG LORD’
Giingong drug lord na-trap sa pansayan, nakuhaag kapin sa P1 milyon nga drugas dihang gironda sa kapulisan ang iyang balay kagahapon sa alas 7:48 sa buntag sa Sitio Taboan, Barangay Madridejos, lungsod sa Alegria.
Si Francisco Ocaña,47, minyo, nagpuyo sa maong dapit, giingong HVT, nadakpan sa
joint operation sa Provincial Drugs Enforcement Unit (PDEU), Provincial Intelligence Branch (PIB) ug Alegria Police Station pinasikad sa search warrant, nga kalapasan sa RA9165 nga gi-isyu ni Judge Leopoldo Cañete, sa Regional Trial Court (RTC) 7 Branch 60 sa Barili.