PETER LIM GIPADAKOP SA KORTE

Ang Makati Regional Trial Court (RTC) niluwat og arrest warrant batok sa Sugboanong negusyante nga si Peter Lim, self-confessed drug lord Rolan “Kerwin” Espinosa, ug ubang daghan pang uban tungod sa kalambigitan sa illegal drugs.

Ang korte nitakda sa ilang arraignment sa kaso sa ala 1:30 sa hapon sa Agusto 28.

Sila si Lim ug Espinosa gikiha sa Criminal Investigation and Detection Group (CIDG) og conspiracy to commit illegal drug trading.

Laing giakusahan mao sila si Marcelo Adorco, Ruel Malindangan, ug mga John Does.

Ang warrant giluwatan upat ka adlaw human ang bag-ong panel sa mga prosecutor sa kagamhanan gitahasan sa pag-reinvestigate sa drug-related complaint batok kang Lim alang sa pagpakigkunsabo kang Espinosa ug uban pa.

Sila si Espinosa ug laing uban gipasakaan og kiha sa laing resolution sa July 2018 sa samang panel of prosecutors.

Napalgan sa panel nga dunay probable cause sa pagkiha kanila og kalapasan sa Section 26(B) in relation to Section 5, Article 11 sa Republic Act 9165 kun Comprehensive Dangerous Drugs Act of 2002.

Matod niini nga ang pag-angkon nila ni Espinosa ug sa iyang aide nga si Adorco sa Senate investigation sa pagkatap sa illegal drugs igo na sa pag-establisar sa probable cause sa pagkiha kanila.

Sila si Espinosa ug Adorco niila kang Lim isip supplier sa illegal drugs.

ANDAM MOSIKOP

Wala pa makadawat og kopya sa warrant of arrest ang Criminal Investigation and Detection Group CIDG-7 batok kang Lim human mimando ang korte.

Matod sa bag-ong hepe sa CDIG 7 Superintendent Lito Patay nga sa ilang nakuha nga impormasyon gikan sa ilang ulohang buhatan, order lang sa korte pagpatambong kang Lim sa hearing karong Agusto 28.

Apan kon adunay mando pagsikop na kang Lim, andam nila kining dakpon kon naa pa sa Sugbo. “Kon naay lain kay mao na ako gipapangita karon kay dili man arrest warrant, order siya nga he will be held for trial,” matod ni Patay.

Ang CIDG ang gihatagan sa tahas pagdakop kang Lim kon aduna nay kamandoan sa korte.

NAA PA SA NASOD?

Nagtuo si Mayor Tomas Osmeña nga wa pa makabiya sa nasod si Lim.

Si Osmeña nibutyag nga higala sila ni Lim, apan di sila suod ug adunay gintang ang ilang relasyon gumikan sa giingong kalambigitan niini sa ginadiling drugas. Ang mayor niingon wa siya nakakita mismo ni Lim nga nia pa sa Cebu, apan nakadungog siya sa iyang mga higala na naa ra sa nasod ang Sugbuanong negusyante.