You took my heart away
Nag-holding hands mi si Jeepryl nga nanulod sa Mall sa downtown. Gikan mi sa eskuwelahan. Lain-lain ang university nga among gitunghaan. Nagkasabot mi nga magkita sa gawas sa maong Mall sa alas sayis sa hapon. Parehas mig oras sa last subject namo sa hapon, five in the afternoon.
“Unsay atong paliton, Clarissa?” “Da, simple lang gud.” Mikidhat ko kang Jeepryl.
One year na ang among relationship ni Jeepryl. Usa ra ka subdivision sa Mambaling ang among gipuy-an maong nagkaila mi. Kasagaran magkadungan mig sakay og sikadsikad paingon sa gawas sa subdivision diin adto mi mosakay og dyip paingon sa tagsa-tagsa namo ka tunghaan. Ug kay hilom na man kong nakagusto niya, dihang gipangulitawhan ko niya, aw, unsa pay dugayan? Gisugot dayon nako siya.
Didto ko dad-a ang akong boyfriend sa nahimutangan sa mga perfume. Namili kog para sa lalaki. Dihang nakapili na ko, gibayran nako ni sa counter. Pagkahuman akong gipaputos og wrapper ug unya gibutangan nakog card. Nagtalikod ko kang Jeepryl nga nagsuwat sa card. “Happy birthday, Dong.” Nindot kaayo kog smile kang Jeepryl dayon kong tunol sa pintuos nga perfume.
“H-Ha? Uy, birthday man diay nako ron, no? Thank you, ha, Clar.”
Gihagkan ko ni Jeepryl sa aping. Iya kong gigakos og kadyot. Nahikatawa na lang ko.
“Nakalimot ka, pero ako wa, Jeep.”
“Matay, tinuod bitaw, Clar, nga nakalimot gyud ko. Unsaon man gud, pulos man lang klase ang akong gihunahuna, ug ikaw sab. Nakahibawo na bitaw ka nga nagmintin kog grado.”
Miyangu-yango ko. Gihagkan ko sa aping si Jeepryl. Eskolar siya sa university nga iyang gitunghaan. Kinahanglang mintinon niya ang dagkong grado aron di siya paphaon sa pagka eskolar. Bisag anak og dato si Jeepryl apan tungod sa iyang kamaayo sa klase, nahiapil gyud siya sa mga eskolar sa maong tunghaan.
Nalipay sab ko kay bright ang akong boyfriend.
Mikiring ang call alert sa selpon ni Jeepryl. Iyang gisusi kon kinsay nagtawag. Namatikdan nako nga mikunot ang iyang agtang. Unya kalit nga misayag ang iyang nawong, kalit siyang nalipay.
“Sus, dugay ka mang wa nako mabalitai, uy.”
Mitan-aw si Jeepryl nako samtang nakig-estorya siya sa nagtawag niya.
(SUMPAYAN)