Beermen mosuway pagsulod sa finals
Duwa karon 7:00 pm- San Miguel
batok Alaska Angkunon na’g suway sa defending champions San Miguel Beermen ang unang lingkuranan sa finals sa ilang pagpakigbatok og balik sa Alaska Aces karong gabii sa Game 3 sa Philippine Basketball Association (PBA) Commissioner’s Cup semi-finals series sa Ynares Center sa Antipolo City.
Kini nga kombati orihinal nga gikatakda niadtong Miyerkules apan nauswag tungod sa dili maayong panahon diin nagpagawas og pahimangno ang National Disaster Risk Reduction and Management Council (NDRRMC).
Ang Beermen taas og moral ning kombatiha human sa ilang kadaugan sa nag-unang duha ka mga duwa sa best-offive series.
Gani sa usa sa iyang nangaging mga interbyu, si Beermen coach Leo Austria naghisgot na kabahin sa finals diin ilang ikaharong ang modaog sa laing semi-finals series tali sa Brgy. Ginebra Gin Kings ug Rain or Shine Elasto Painters.
Sa ilang bahin, ang Aces ni coach Alex Compton malaumon gihapon nga makabangon bisan wala ang duha sa ilang mga sinaligan nga sila si Calvin Abueva ug Chris Banchero.
Si Abueva ilang gipahamtangan og indefinite suspensyon samtang si Banchero adunay angol.
Alang kang Compton, wala sila’y angayang ikauwaw kon mapakyas sila ning maong series ug dako na niyang garbo nga nakaabot sila ning puntoha taliwala sa mga kahasol nga ilang naagian.