EX-POLICE GIPUSIL SUD SA TUNGHAAN
KANHI SPO2 LOZANO SAMDAN SA ABAGA, TIYAN
Kanhi pulis sa siyudad sa Sugbo naangol human gipusil sulod sa Labangon Bliss Elementary School sa Barangay Labangon, siyudad sa Sugbo pasado alas 3 ang takna gahapon sa hapon.
Ang biktima giila nga si kanhi SPO2 Armando “Ahmed” Lozano, taga dan A. Lopez sa mao nga barangay.
Nakaangkon og samad pinusilan si Lozano sa tuong abaga ug tiyan gikan sa kalibre .45 nga pistola base sa nakuha nga mga basiyo sa bala sa dapit.
Matod ni SPO1 Jojie Magdadaro, homicide investigator sa Punta Princesa police, nga motambong untag induction of officers si Lozano isip over all PTA president sa Labangon Bliss Elementary School covered court.
Apan kalit lang giduol sa usa sa mga gunman ug dayon gipusil.
Wa maigo sa unang pagpusil si Lozano ug nakadagan, apan gigukod siya ug giusban sa pagpusil.
Naigo na siya makaduha, apan bisan samaron, nakadagan gihapon siya.
Nalipat ang usa sa mga gunman,wa makakita kang Lozano, kinsa nakatago ilawom sa katre sud sa home economics room.
Sigon ni Cebu City Councilor Eugenio Gabuya, kinsa didto sa tunghaan, uban kang Konsehal Joy Augustus Young, nga nagkatibuwaag ang mga ginikanan, estudyante ug mga magtutudlo atol sa hitabo.
Matod ni Gabuya nga midagan si Lozano sa stage, apan gigukod siya sa duha ka mga gunman ug gipusil na sab.
Nadungog ni Gabuya ang ubay ubay nga mga buto sa armas.
Matod ni Gabuya sa interview sa sibyaanang dyLA, ang duha ka gunman naghuwat og pipila ka gutlo, ug ilang gipangti-unan ang mga tawo nga moduol.
Si Lozano nga na-dismiss sa serbisyo niadtong 2010 tungod sa kasong robbery, napili nga presidente sa PTA ug oath taking nila kagahapon.
Matod ni Gabuya nga usa siya sa mga dinapit ni Lozano. Igong pag-abot ni Gabuya sa
school compound, iya dayong giduol ug gilamano si Lozano.
Sa dihang moduol unta si Gabuya sa vice president, diha na atakeha si Lozano.
Dali usab nga gitabang sa mga ginikanan sa mga tinunan si Lozano ug gidala sa usa ka pribadong tambalanan sakay sa ambulansya sa barangay. /
Nakakuha ang mga imbestigador og tulo ka mga basiyo sa bala sa kalibre .45 nga pistola ug usa ka bala sa dapit nga nahitaboan.
“Misulod gyud ang duha ka suspek sa eskwelahan. Samtang nag barog-barog ni si Ahmed diri sa covered court kay padung naman magsugod ang induction of officers, gipusil dayon ni siya. Maayo gani kay nakatago dayon siya sa H.E room,” matod ni Magdadaro. /