PBA SEMIS SUGDAN
Duwa karon 6:45 pm- Alaska batok San Miguel
Sugdan karong gabii sa defending champions San Miguel Beermen ug Alaska Aces ang ilang gikaintapang best-of-5 semi-finals series sa Philippine Basketball Association (PBA) Commissioner’s Cup sa Mall of Asia Arena sa Pasay City.
Kon hisgutan ang panagparang ning duha ka mga kampo sa playoffs, dili mahikalimtan ang nahitabo niadtong 2016 Philippine Cup finals diin nakamugna og kasaysayan ang Beermen isip labing unang team nga nakabangon gikan sa 0-3 nga biya aron angkunon ang titulo.
Ang maong kalampusan sa Beerman gitawag sa ilang mga sumosunod og “Beer-acle” gumikan kay daw milagro ang nahitabo niadtong higayuna.
Dili ikalimod nga dulot sa unod ang kasakit nga gibati sa Aces niadtong higayuna ug mao ang pagpanimalos, labing seguro, maoy nagpilit sa ilang alimpatakan ning higayuna.
Ang Aces katulo gilupig sa Beermen sa upat ka mga komperensya nga nagparang sila sa finals gikan niadtong 2015 Philippine Cup.
Grabe na ang gikumkom nga pagdumot sa Aces ngadto sa Beermen ug bisan unsang orasa, puwede kining moulbo.
“Kaya dapat namin paghandaan ng husto sila dahil siguradong gustong-gusto nilang makabawi,” matod ni San Miguel coach Leo Austria sa PBA.Ph.
Sama sa naandan nilang mga engkuwentro, ang Beermen tataw nga inilog.
Hinuon sa gipakitang kabangis sa Aces gikan pa sa elimination round, posibleng ilang mabalit-ad ang sitwasyon sa pagpadayon ning maong series.
“SMB has been the best team in the PBA the past four years. That hasn’t changed this conference. In fact, they added a legit NBA veteran to their team and the number one draft pick,” pag-angkon ni Alaska coach Alex Compton.
Unya ning duwaa, posibleng mobalik na og duwa ang No.1 rookie sa Beermen nga si Fil-German Christian Standhardinger.
“This will be the strongest team we have ever faced, and we will need to be a team of destiny if we are to come out of this series victorious,” dugang ni Compton.
Sa ilang bahin, ang Aces padayong mokombati nga wala ang usa sa ilang mga sinaligan nga si Calvin Abueva, kinsa ilang gipahamtangan og indefinite suspension.
Wala pa’y nasayod kon kanus-a malibkas ang suspensyon ni Abueva.
Hinuon, napamatud-an sa Aces nga kaya nilang mobarog nga wala si Abueva, gani naabot sila ning puntoha nga wala ang gitawag og The Beast.
Sa laing bahin, gipukan sa Rain or Shine Elasto Painters ang GlobalPort Batang Pier, 103-97, sa miaging gabii aron angkunon ang katapusang puwesto sa semi-finals.
Ikaharong sa Elasto Painters ang Brgy. Ginebra Gin Kings sa laing parisan sa semi-finals.