OIC official sa LTO gikiha sa director
Kanhi officer-in-charge sa Land Transportation Office (LTO) Talisay Extention Office gireklamo ni LTO 7 Director Victor Caindec sa Ombudsman og kalapasan sa Anti-Graft and Corrupt Practices Act.
Kini nunot sa pagsulbong sa gidaghanon sa mga sakyanan nga narehistro sa maong opisina apan wa nisaka ang gidaghanon sa mga inspector, nga gikahibung sa direktor kon giunsa sa paghimo ang proseso.
Personal nga giduso ni LTO 7 Director Victor Caindec ang reklamong kalapasan sa Anti-Graft and Corrupt Practices Act batok ni kanhi OIC Engr. Bernardo Borromeo, Jr..
Matod ni Caindec nga dihang nisulod si Borromeo sa LTO Talisay niadtong Marso karong tuiga, nisaka ngadto sa 1,000% ang gidaghanon sa mga sakyanan ug motorsiklo nga narehistro, apan nasuta nga gamay ra ang personnel sa opisina nga maka-inspeksiyon.
Alang niya, imposible nga mahuman sa gamay ra nga inspectors ang pag-inspeksiyon sa gidaghanon sa mga sakyanan nga narehistro.
Nagpadayon kini hangtod sa Mayo.
Sigun sa director, klaro nga dunay “shortcut” nga nahitabo.
Siya nagtuo nga may mga personnel sa ahensiya nga nakapahimulos niini.
Matod ni Caindec nga nipadala kaniya og suwat si Borromeo agig pagpasabot nga nihimo siya og inspeksiyon, apan gikwestiyon sa director ang paagi sa pag-inspeksiyon.
Una pa lang kini sa serye pa sa mga kaso nga isang-at ni Caindec batok sa iyang mga sakop nga nakahimo og kalapasan ug nakaagrabyado sa gobiyerno.
Gikan sa LTO-Talisay, nadestino na isip OIC sa LTO-SM dinhi sa Sugbo si Borromeo, apan on medical leave pa siya sa pagka-karon. /