Mga taga BJMP sa Carcar, Bantayan negatibo sa gipahigayon nga drug testing
Mga personnel sa Bureau of Jail Management and Penology (BJMP) sa siyudad sa Carcar ug Bantayan, negatibo tanan sa gipahigayon nga mandatory random drug testing sa Cebu Provincial Anti-Drug Abuse Office (CPADAO).
Sa laing bahin, ang CPADAO duna nay legal opinion labot sa posibleng pagpaubos sa mga piniriso sa drug testing.
Negatibo sa gipahigayon nga mandatory random drug testing sa CPADAO niadtong Mayo 25 ang moabot sa 22 ka mga personnel sa BJMP sa Carcar City Jail. Samtang, negatibo usab ang laing 14 nga personnel sa BJMP sa Bantayan District Jail sa laing drug test nga gihimo kagahapong adlawa.
Matod ni CPADAO Executive Director Ivy Meca nga ang jail wardens sa duha ka mga jail facility maoy nihangyo sa iyang opisina nga mopahigayon sa drug test.
Gihangop niya ang pag-negatibo sa ilang mga sakop.
Sa laing bahin, ang CPADAO duna nay legal opinion gikan sa Dangerous Drugs Board (DDB) labot sa posibleng pagpaubos sa mga piniriso sa drug testing.
Matod ni Meca nga way dautan sa pagpaubos sa mga piniriso sa drug test apan giklaro usab sa opisyal nga di mahimong gamiton sa mga legal nga proseso ang resulta niini.
Buot pasabot, di kini mahimong gamiton sa posibleng plea bargaining sa korte o pagpasaka og dugang kaso sa piniriso nga mag-positibo.
Kon duna may gamitan sa drug test result, kini alang lang sa monitoring sa kahimtang sa mga piniriso ilabi na kon dunay nagpadayon nga rehabilitation program sa jail facility diin siya nabalhog.
Ang CPADAO nagpanday og pormal nga rehabilitation program alang sa mga piniriso sa Cebu Provincial Detention and Rehabilitation Center. Ipahaom kini sa kasong ilang giatubang.
Kabahin sa rehabilitasyon sa mga nag-atubang og drug cases, ang posibleng pagpaubos kanila sa drug test alang sa screening ug monitoring.