'No collection policy' sa pagpa enroll sa DepEd

Gipanghimug-atan karon sa Department of Education (DepEd) ang no collection policy sa tanang mga pampubliko nga tunghaan karon nga mobukas na usab ang klase karong Lunes, Hunyo 4.

Gipahibawo sa DepEd 7 nga wala’y koleksyon nga mahitabo gikan paman sa pagsugod sa enrolment hangtod sa hingpit nga pagsugod na sa klase.

Matod ni DepEd OIC assistant regional director Sal Jimenez nga tanang kontribusyon o donasyon, nagpabilin kini nga boluntaryo.

Kini bisan paman nga mao kini ang masabutan sa Parents Teachers Asscociations (PTA) general assembly.

Dugang ni Jimenez nga dili kini mamahimong rason nga dili makatarung sa pagtungha ang mga tinun-an.

Samtang kon aduna’y mga reklamo ang ginikanan kabahin sa mga amutan sa ilang mga anak, mamahimo nga mosumbong kini una sa principal ug kon dili masulban, isaka kini sa district, division, dayon sa region.

Samtang tungod kay aduna’y pipila ka mga Marawi victims ang anaa na nagpuyo sa Sugbo gipahibawo ni DepEd regional director Juliet Jeruta nga mamahimo ra gihapon sila nga motungha sa mga pampubliko nga tunghaan bisan karon nga wala pa sila makakuha sa ilang gkinahanglan nga rekisitos.

Matod ni Jeruta, ang birth certificate makuha sa Philippine Statistics Authority (PSA) apan kon ang tunghaan sa bata ngadto sa Marawi, lisod na kini nga kuhaon.

Dugang ni Jeruta, sa Central Office na lang kini nila i-trace aron dili kini mahimong babag sa mga tinun-an gikan sa Marawi nga makatungha dayon karong pormal nga pagabli sa klase.