Team JPD mosalmot sa Asics Relay Phils.
Napulo’g unom ka runners gikan sa Visayas ug Mindanao ang morepresentar sa Team JPD sa 42-kilometer ug 21K relay competitions sa Asics Relay Philippines nga gikatakda karong Mayo 26 sa SM By The Bay sa SM MOA, Pasay City.
Ang delegasyon, nga pangulohan ni Cebuano coach John Philip Dueñas, mosalmot sa all men’s 42K relay, all-women’s 42K relay, mixed 42K relay ug mixed 21K relay.
Ang matag runner sa 42K relay modagan og 10.5K samtang ang matag runner sa 21K modagan og 5.25K.
Ang JPD all-men 42K relay team gilangkuban nila ni Jimboy Lugay ug Bobby Tadlas sa Bukidnon, Keenan Lou James Caburnay sa Davao ug 2016 Milo Marathon National champion Jeson Agravante sa Bacolod.
Nahisakop sa JPD all-women 42K relay mao sila si Christine Hallasgo ug Esterlita Organiza sa Malaybalay, Bukidnon, Melody Perez ug Geniecel Saballa sa Cebu City.
Naglangkob sa mixed relay 42K mao ang magsuong sila si John Philip ug Chobie Dueñas lakip na sila si Bernadeth Santillan ug Davaoeño Elmer Bartolo.
Naa sa 21K mixed relay mao sila si Mary Joy Loberanis sa University of San Carlos Basic Education Department (USC-Bed), Arian Arbois Jr, ug grassroots runners Jhonn Marc Dizon ug Jessie Abelgos sa Sisters of Mary Boystown.
Nagkanayon si Dueñas, kinsa dugay na nga trainer ni Olympian Mary Joy Tabal, nga ang mga modaog ning maong lumba ipadala sa Asics sa usa ka lumba sa Singapore, Malaysia o Indonesia.