Quo warranto, unsa ning mananapa?
Daghan ang mingkondenar sa Korte Suprema sa iyang hukom pabor sa quo warranto batok kang Chief Justice Maria Lourdes Sereno.
Sa ingon napalagpot sa iyang katungdanan isip labawng mahistrado si Sereno. Na- way bili ang protesta sa gatusan ka mga tawo nga kargado mga tinun-an nga milaban kang Sereno.
Unsang mananapa kining quo warranto? Di ni mananap o insekto ba hinuon kondi usa ka mando o writ sa kanhiay nga karon mahimong reklamo o kiha nga magkuwestiyon sa usa ka tawo sa katungdanan nga iyang gikuptan.
Ang quo warranto usa ka latin word nga sa English pa, “what warrants?” o unsay gisandigan? Gireklamo si Sereno ni Solicitor General Jose Calida.
Sa petition o kiha niya gipasabot nga pakyas si Sereno paghatag sa iyang Statement of Assets, liabilities & Net Worth (SALN) sa Judicial Bar Council (JBC) sa 2012 pagtudlo niya isip chief justice.
Kini rekisito una matudlo isip hepe mahistrado sa Labawng Hukmanan. Sa daghang higayon way SALN si Sereno matod pa ni Calida nga supak sa batakang balaod.
Ang supak sa quo warranto nag-ingon nga di sala ni Sereno kondi sa JBC nga nidawat ug ni-recommend niya sa pangulo aron tudluon sa Korte Suprema.
Ang uban nga naglagot nagtumbok sa Korte Suprema nga nagbugal-bugal sa demokrasya ug katarungan. Way batasan kuno sa kongreso nga nag-impeach kang Sereno. Nangilog kini.
Wa sad kuno mohatag higayon sa Senado nga maoy mopalagpot kang Sereno pinaagi sa impeachment trial. Di quo warranto ang magamit batok sa mga opisyal nga mapalagpot lang pinaagi sa impeachment suma sa konstitusyon.
Apan nakahukom na ang Korte Suprema. Ang tanang pagsaway apil nang pagtamay ila nang gisuyop. Mga tawo ra gud sila, masayop man gani ang kabaw upat ang mga tiil.
Unsay ilang hukom mahimo nang balaod nga sundon ni bisan kinsa nga Filipino. Ingon ani kabug-at ang Korte Suprema. Kon sila masayop ingon sad ani ang hagno sa kapintas. Makaapelar pa si Sereno hinuon sud sa 15 ka adlaw.
Ang linugdangan niini karon mao nga mabanhaw diha kang Sereno ang kabangis ni Leila de Lima. Apan lahi si Sereno kay limpyo ug gilabanan sa linibo ka mga tawo.