Sayon duolon, sayon pangitaon

Matag piniliay kanunay natong madunggan ang sibaw kaayo nga komedya nga nagkanayon ‘ sayon duolon, lisod pangitaon”.

Paghulagway kini sa usa ka bati nga kandidato nga kung basihan ang iyang pagka tawo maduolan gyud sa tanang higayon. Madangpan sa nanginahanglan og solusyon sa ilang mga problema.

Ang problema unsaon nimo pagdangop aron sumbongan sa problema nga kanunay mang wala sa opisina o sa ilang balay mismo.

Mao na ang ilang giingon sayon duolon apan lisod pangitaon. Diha sa inyong barangay naa ba ning maong matang sa kandidato. Kung naa man gani unya maoy imong botaran, may panahon pa nga mangita ka og lain.

Kung parehas ra sab ang tanan ug kalidad pilia na lang sab tong sayon duolon, lisod pangitaon pero makit-an ra gihapon unya’g ka ugma o sa sunod adlaw.

Ang lain man sab gud nga gipasabot ning maong komedya nga ang imong suportahan maduolan ug maminaw sa imong yangungu. Ang problema kay maayo lang sa pagpaminaw apan wa sa’y aksiyon nga gihimo.

Pulos lang pasalig. Mao ni ang kalibutan sa serbisyo publiko. Ang nanagan karon sayod nga kung sila ang mahimong mananaug karong Lunes di lang ilang pamilya ang ilang serbisyohan.

Modaghan ang manoktok sa ilang pultahan. Usahay mahitabo gani taliwala sa oras sa paghinanok. Ang usa ka higala niingon nga sukad nga nahimo siya nga opisyal sa barangay, hasta ang billing sa iyang cellphone ni-triple.

Labaw sa tanan nisaka ang galastohanan kay daghang bayronon ang atimanon nga di na gani ma-charge ngadto sa barangay.

Samot na kung gamay ra ang honorarium kay minos sab og kita gikan sa buhis ang barangay.

Ang uban wa gyud makatilaw og kiha. Pagka opisyal na nagpusot-pusot ang summon kay gigukod sa kontra sa politika.

Ang ubang pasangil tinuod. Ang uban tungod ra gyud sa politika. May naabsuwelto ug may nagsige pa ug balikbalik sa buhatan sa Ombudsman. Pait ang kinabuhi sa panerbisyo.

Mao nga sa mga botante gawas sa isyu sa drugas, kadtong kandidato nga sayon duolon unya sayon ra sab pangitaon mas bentaha nga maoy iloklok diha sa puwesto.

TANGTANG

Nakuyog ko sa taga Department of Environment and Natural Resources atol sa ilang gipahigayon nga Oplan Baklas niadtong Huwebes. Operasyon ni sa pagpanangtang sa mga campaign materials nga gipamutang sa mga punoan sa kahoy. Kasagaran niini gilansang gyud. Pagka looy sa kahoy.

Duna gu’y kahoy nga patay na kay natusak tusak sa daghang lansang. Gawas sa campaign materials namungingi sab sa mga advertisement ang uban.