Malasakit Center giablihan na
Malasakit. Ang Malasakit Center sa “Malasakit Programs” ni Presidente Duterte nga giandam ug tagana alang sa mga kabus giablihan kagahapon sa hapon sa Vicente Sotto Memorial Memorial Medical Center (VSMMC).
Gipangunayan ug gipangulohan ni Presidente Digong ang pag-abli sa Malasakit Center nga gitawag nga “onestop shop” nga anha ibutang sa hospital sa kagamhanan sama sa VSMMC nga maoy mohatag og hinabang pinansyal ug medisina sa mga kabus nga dunay balatian.
Ang Malasakit Center giabagan sa Philippine Charity Sweepstakes Office, Department of Social Welfare and Development, Pagcor, ug Department of Health. Ang pundo maggikan sa PCSO ug sa Pagcor.
Ang pagmugna sa Malasakit Center usa ka pagtoman sa gisaad kaniadto ni Presidente Digong panahon sa kampanya nga mahatagan ang mga pobre og hinabang sa panglawas sa way daghan kuskus balungos.
Sa wa pa ang Malasakit Center ang DSWD maoy dagananan sa mga kabus mga mahospital nga nagkinahanglan og tabang pinansyal ingon man sa medisina apan dili igo ang pundo sa DSWD.
Karon nga apil na ang PCSO ug Pagcor sa paghatag hinabang pinansyal, makahatag gaan ni sa mga problema sa kabus. Abi ninyo ang mahospital nga way kwarta mosamot ang sakit nga maghunahuna sa dakong bayronon sa hospital.
Maayo unta og magpadayon ni nga programa hangtod sa hangtod bisan kon lain na ang administrasyon ug dili lang ni matawag nga pamulitika. Apan, di kaha ni mokumpetensya sa libre nga tambal ni Mayor Tomas Osmeña?
Kon ang panglawas sa mga kabus ang atong lantawon wala ni kumpetensya kay pulos man mohatag og hinabang sa mga kabus nga mahospital. Galing lang kay kon ang nagpaluyo sa programa maoy tan-awon makita nga morag dunay pamulitika.
Apan ning panahon ni Presidente Duterte di tingale angayan maghisgot pa ta og kang kinsa ning Malasakit Center kay, matod pa, sa opisina sa Presidential Assistant for the Visayas ang sentro gimugna alang sa mga kabus nga maospital. Sa ato pa, ang sentro iya sa katawhan nga giingon “poorest of the poor”.
Way usa sa mga tawo ni Presidente Duterte nga mangangkon nga iya ni ideya o programa. Apan angayan gihapon nga pasalamatan si Presidente Duterte ug ang iyang mga hinanib sa pagpatoman sa iyang gisaad sa miaging piliay.
Sa panahon sa kampanya, daghan ang mibanat ni Presidente Duterte nga pulos pangampanya ang iyang gisaad. Karon, atong makita nga matinud-anon diay si Presidente Digong sa iyang mga saad.