3 ka kawani gisuspenso sa City Hall, gipasakaan og kaso ni Osmeña
Gipasakaan na og kaso sa Cebu City Government pinaagi ni Mayor Tomas Osmeña ang tulo ka mga kawani sa City Hall nga maoy responsabli sa giingong pag-ubos sa fair market value sa SM Prime Holdings Inc.
Ang tulo nga nag-atubang og kasong administratiba sa Office of the Ombudsman Visayas mao silang silang Liezel Gonzaga ang kanhi OIC sa City Assessor’s Office, Sybil Ann Reambonanza, kanhi head sa Building and Machinery ug Hilario Alicante.
Ang tulo ka mga kawani sa City Hall gipaubos na ni Osmeña sa preventive suspension sulod sa 60 ka adlaw diin wala sab silay sweldo nga madawat aron dili sila maka-impluwensiya sa pagahimuon nga imbestigasyon.
Ang pagpasaka og kaso sa giingong responsabli sa pag-under declare sa edepisyo sa SM Seaside aron mokunhod usab ang real property tax adunay rekomendasyon gikan sa Cebu City Employee Management Committee on Inquiry ( CCEMCOI).
“Said personnel were found to be in conspiracy with each other in the under-declaration of SM Seaside Building’s Fair Market Value in Real Property Tax Declaration amounting to 2 billion pesos or more than 23 million of Real Property Taxes not collected by the City per year,” tipik sa gipagawas nga press release sa Public Information Office (PIO).
Ang kasungian ni Osmeña ug tag-iya sa SM gumikan sa maong isyu maoy hinungdan nga napagan ang mga sangang buhatan sa Banco de Oro diin si Osmeña nipasaka og kaso batok sa maong mga banko sanglit adunay ilang branch nga P35 pesos ra ang business tax niadtong tuig 2015.