Mga bitamina nga magpanindot sa imong panit
Ang maayong panit nagsugod sa maayong nutrisyon. Tinuod nga ang panit pagpanalipod sa imong panit gikan sa silaw sa adlaw maoy numero unong paagi, apan nagkinahanglan ka usab og nutrisyon aron magpabiling healthy ug batan-on tan-awon. Ang labing maayong mga tinubdan niini mao ang mga prutas ug utanon. Kon daghan kang gikaon nga greens, dako ang kahigayunan nga daghan ka og nakuhang nutrisyon. Apan mahinungdanon usab nga kahibawo ka kon unsa nga mga bitamina ang naghatag og maayong benepisyo sa panit aron mas makasabot ka.
Nia ang pipila ka labing maayong mga bitamina alang sa imong panit.
Vitamin A
Kini nga bitamina nag-function sab nga antioxidant ug mapalgan kini sa kamote, carrots, alugbate ug mangga. Laing tipo sa A vitamin nga gitawag og retinoid mapalgan sa karne sa baka, itlog ug dairy..
Vitamin C
Ang vitamin C di lang maayo alang sa imong tibuok nga panglawas, lakip na usab sa imong panit. Makuha mo ang imong vitamin C kon mokaon ka og citrus fruit, bell peppers, broccoli, strawberries, tamatis ug uban pa. Ang rason nganong maayo ang vitamin C sa imong panit mao nga motabang kini sa paggama og collagen, usa ka connective tissue nga magtabang sa pagpahugot sa atong panit.
Vitamin E
Laing antioxidant sa mga bitamina, ang vitamin E di katupngan sa pagpanindot sa imong panit. Kini nga bitamina manalipod sa imong panit gikan sa kadaut sa free radicals. Mga pagtuon nagpakita usab nga mao ni ang motangtang sa acne.
Vitamin D
Gitawag kini og “sunshine vitamin” kay makuha mo kini gikan sa silaw sa adaw. Kon sa imong pagtuo kuwang ka sa vitamin D, mahimong moinom ka og vitamin D supplement. Sagad sa gatas puno sa vitamin D. Naa sab niini ang musroom, isda ug itlog.
Vitamin K
Ang vitamin K mahinungdanon alang sa pag-alim sa samad ug mga pangus. Kay kon wa ang vitamin K, ang imong dugo di molapot ug mogahi. Sa panit, ang vitamin K maoy mokombate sa tanan nga maghimo sa imong panit nga moitom, sama kon duna kay circulatory problem.
Vitamin B3
Ang vitamin B3 nailhan usab nga niacin, ug mapalgan kini sa daghang mga pagkaon, diha sa mananap ug tanom. Maayo kini alang sa maanindot nga panit ug ingon man sa imong utok, nervous system ug dugo. Makatabang kini sa pagpabata sa imong panit.