San Fernando miila sa TCPL, SEDC
Ang lungsod sa San Fernando miila sa mga natampo sa Taiheiyo Cement Philippines, Inc. (TCPI) ug Solid Earth Development Corp. (SEDC) alang sa lokal nga kaugmaran ug kauswagan sa mga komunidad.
Gipasidunggan sa lokal nga kagamhanan ang duha ka mga kompanya sa managlahing plake sa pag-ila alang sa ilang pakigpanaghiusa sa administrasyon paingon sa malungtarong kaugmaran ug ingon man sa pag-alima sa kinaiyahan.
Nangunay si Mayor Lakambini G. Reluya sa pagtunol sa maong pag-ila ngadto sa mga opisyal sa mga kompanya atol sa dili pa lang dugay nga pagsaulog sa kapistahan sa municipal gymnasium atubangan sa libo-an ka mga lumolupyo.
Si Vanessa N. Bongcawil, nagduma sa corporate and general affairs sa TCPI, ug HR manager Zenith L. Rubi midawat sa kompanya sa semento.
Si Mitzie Almira I. Carin, human resources and administration division manager sa SEDC, mao sab ang midawat sa pag-ila alang sa kompanyang tig-mina ug nagpadagan og pantalan, uban nila Gines T. Boltron ug Jessiel S. Bonghanoy, mga community relations officer.
Namatigayon ang TCPI ug SEDC sa San Fernando sa kapin na sa duha ka dekada nga nagtagad sa epekto sa ilang masigka-operasyon sa kalikopan ug sa komunidad.
Gilatid kini sa tagsatagsa nilang Environment Protection and Enhancement Program (EPEP) ug sa managlahing Social Development Management Program (SDMP) ug Community Development Program (CDP).
Una na’ng giila ang ilang mga gipamuhat sa Probinsya sa Sugbo ug sa Cebu Chamber of Commerce and Industries, mga pagkutlong mipalig-on pa sa ilang paglahutay nga mopadayon ug mopalungtad pa sa ilang mga programa.
Tiggama ang TCPI sa inilang produktong Grand Cement sa planta niini sa Barangay South Poblacion ginamit ang mga minerales nga gimina sa SEDC sa bukiran sa lungsod. Tigpadagan sab ang SEDC sa pantalan nga gigamit sa TCPI sa paghatud sa mga produkto niini.