My New Year’s Resolution
Dalagang guwang si Tiya Jenny. Dako man tuod siyag posisyon sa gitrabahoang kumpaniya sa siyudad, apan boring ang iyang kinabuhi. Chief accountant siya. Guwapa siya, mestisahon, husto sa height ug seksi. Mao bitaw nga bisag edaran na siya apan daghan gihapon ang nakagusto niya. Apan kasab-an niya ang mga lalaki nga mamisita niya.
Balibaran dayon niya kon pangulitawhan siya.
Aw, mituo man tuod ko sa iyang giingon nga angay lang duwa-duwaan ang mga lalaki, apan nakigsuod sab kog mga lalaki, uy. Di parehas kang Tiya nga naglikay gyud sa mga lalaki. Mao bitaw nga man hater siya.
“Kinsa man tong imong gikaestorya sa selpon, Joanna?”
Usa ka gabii nga diha ko sa sala ug nakigsulti og kadyot sa usa sa akong mga admirer, giduol ko ni Tiya Jenny.
“Wa pa diay ka matuo’og, Tiya?”
Gitan-aw ko ang orasan sa akong selpon. Ten in the evening na. Wa ko makamatikod sa paggawas ni Tiya sa iyang kuwarto nga duol ra sa sala. Nagtapad lang ang among kuwarto ni Tiya. Bungalow type ang balay sa akong iyaan.
“Wa pa ko tulga. Kinsa lagi tong imong gikaestorya, Joanna?”
Morag may kasuko na ang tingog sa akong iyaan.
“Da, ang gahing ulo kong suitor. Bisag giunsa kog pasabot nga wa koy gusto niya, nagsige gihapog samok nako.”
“Pasagdi siya, Joanna. Paglikay niya. Wa kay makuhang kaayohan gikan sa mga laki.”
Miyango ko. Aw, husto man sab si Tiya. Ang nangagi kong mga boyfriend nga gibuwagan nako, dali rang nakakitag girl nga ilang gipuli nako. Di na gyud tingali makita ron ang matinud-anong lalaki, Kanang forever nga magmahal.
“Ayaw gyud kalimot sa akong gitambag nimo, Joanna. Ayaw usiki ang imong panahon sa mga laki!” “Oo, Tiya.”
Unya mibalik nag sulod si Tiya Jenny sa iyang kuwarto. Mikiring na sab ang akong selpon. Si Ritchel na sab ang nagtawag.
“Nganong mitawag kag usab, uy?” Gihinay ko ang akong tingog kay basig makadungog si Tiya Jenny.
“Sugta na lagi ko, Joanna. Love lagi ka nako.”
Nagpanglingi ko sa kuwarto ni Tiya.
“Sige na lang, uy.” “Basta ha!” Namatikdan ko ang kalipay sa tingog ni Ritchel. Napugos kog sugot niya aron mohunong na siyag tawag nako sa selpon.